Një ish-punonjës Policie u ekzekutua dje në një atentat të organizuar nga 3 persona të maskuar, pranë shtëpisë së tij, në Selitë të Tiranës.
Viktima është Arben Bilali, 50 vjeç, baba i tre fëmijëve, i cili gjeti vdekjen rrugës për në spital. Ngjarja e rëndë ndodhi rreth orës 14:30, kur Bilali sapo kishte zbritur nga makina tip “Hyundai” dhe do të shkonte në shtëpinë e tij. Në këtë moment ai është qëlluar me breshëri, me të paktën 14 plumba, nga një armë automatike.
Ndonëse i ruhej një atentati të mundshëm, pasi i kishte shpëtuar një herë 9 vite më parë, dje atentatorët kishin marrë masat dhe llogaritur gjithçka. Sipas burimeve nga grupi hetimor, autorët e ngjarjes e kanë pritur aty brenda një automjeti “Mercedez Benz S Class”, blu i errët, me targa të huaja. Sapo e kanë parë që po afrohej me makinë kanë hapur zjarr drejt tij, duke e lënë të plagosur rëndë dhe më pas janë larguar. Mësohet se në drejtim të 50- vjeçarit ka qëlluar njëri nga autorët, i cili nuk ka zbritur nga makina.
Ai ka qenë i ulur në sediljen e pasme pas shoferit dhe pa nxjerrë kokën në dritare, ka ulur xhamin duke qëlluar. Dëshmitarët, disa prej të cilëve e kanë transportuar për në spital, kanë deklaruar për Policinë se 50-vjeçari kishte ende shenja jete. Megjithatë, nuk ka arritur t’u mbijetojë plagëve.
NGJARJA
Salla Operative e Policisë së Tiranës është lajmëruar dje në orën 14:35 për të shtëna të shumta në zonën “Selitë”. Kur shërbimet më të afërta të Komisariatit nr.2 janë nisur drejt vendit të ngjarjes, një tjetër telefonatë e mbërritur në sallë sinjalizonte Policinë se ishte qëlluar ndaj një personi. Kaq mjaftoi që drejt vendngjarjes të niseshin me shpejtësi edhe oficerë të Krimeve të Rënda dhe ekspertë kriminalistë. Burimet thanë se me të mbërritur në vendin ku kishte ndodhur krimi, është mësuar se personi i qëlluar ndërroi jetë rrugës për në spital. Në vendngjarje mbërritën edhe drejtori i Policisë së Tiranës dhe dy zv.drejtorët si dhe prokurori i gatshëm. Viktima Arben Bilali ishte i njohur për Policinë, edhe si ish-efektiv i Forcave Speciale, por edhe si person që i kishte shpëtuar një atentati, 9 vite më parë. Nga ana tjetër, atij i ishin vrarë edhe dy vëllezër, në të njëjtën zonë ku ai u ekzekutua dje.
HETIMI
Burime nga grupi hetimor thanë dje se pista kryesore e vrasjes së Arben Bilalit është ajo e hakmarrjes. Të njëjtat burime thanë se Bilali ishte pjesë e një familjeje, që prej vitesh janë në një hasmëri me një tjetër familje në “Yzberisht” të Tiranës. Prej këtij konflikti, që daton në vitin 1997, numërohen disa të vrarë nga të dyja familjet. Dy prej viktimave janë vëllezërit e Arben Bilalit, Bujari dhe Leonardi. Nga ana tjetër, burimet thanë se është marrë në konsideratë edhe një pistë tjetër, që ka të bëjë me detyrën e bashkëshortes së viktimës. Ajo është prej vitesh oficere e Policisë së Tiranës, së fundmi punon në strukturat e Antiterrorit. /Panorama/
