Sulmuesi i PSG-së, Neymar Junior do t’i nënshtrohet një “trajtimi konservativ” në kyçin e këmbës pasi ka thyer kockën e pestë, të njëjtin dëmtim që pësoi edhe sezonin e shkuar.
Ky lloj trajtimi është bërë me konsensus të mjekut brazilian që e operoi vjet dhe mjekëve të PSG-së. Në ndërthurje të metodave bashkëkohore të mjekësisë do të ketë edhe trajtim me mjekime popullore nga Brazili, gjë e cila u kërkua nga lojtari dhe familja e tij, transmeton Telesport.
Lajmin konfirmoi vetë klubi i PSG-së me një njoftim zyrtar ku theksoi: “Pas shkëmbimeve brenda grupit të ekspertëve, në konsensus u vendos për t’i ofruar Neymar një trajtim konservativ për lëndimin e metatarsal të pestë. Të informuar për këtë rekomandim, sulmuesi ndërkombëtar brazilian i Paris Saint-Germain ishte në pajtim të plotë me këtë protokoll”.
Neymar do të mungojë afërsisht 10 javë, pas dëmtimit që mori në kyçin e këmbës. Kështu që ylli i PSG-së, do të humbasë të dyja sfidat me Man. United, për Ligën e Kampionëve dhe do të rikthehet në muajin prill. Braziliani do të lërë “sërish” në baltë ekipin e tij për të dytin sezon rradhazi në fazën më deçizive.
