Nga Boldnews.al
Prokurorja e Përgjithshme (e Përkohshme), Arta Marku, sapo erdhi në Tiranë, mesa duket ka harruar se ka institucion prokurorie edhe në zonën e saj të origjinës, në Pukë. Drejtuesja e institucionit lokal, Elidiana Kasaj, në një letër drejtuar Këshillit të Lartë të Prokurorisë (KLP) kërkon që të merren masa urgjente për plotësimin e organikës me prokurorë.
Kjo, për shkak se Kryeprokurorja e Përkohshme, Arta Marku, e ka lënë vetëm në atë institucion për t’u përballur me të gjithë çështjet penale në qytetin verior.
Në një shkresë zyrtare, Kasaj njofton KLP-në se institucioni që ajo drejton, nga tre prokurorë që ka në organikë, aktualisht ka vetëm një, atë vetë.
“Gjatë kësaj periudhe kohore, disa herë në këtë periudhë, për periudha të ndryshme, Prokurori i Përgjithshëm (i Përkohshëm) ka komanduar prokurorë nga rrethet e tjera gjyqësore. Aktualisht, nga data 07.12.2018, në Prokurorinë e Rrethit Gjyqësor Pukë rezulton se në detyrë është vetëm drejtuesja e institucionit..” shkruan Elidiana Kasaj.
Shefja e prokurorisë së Pukës vijon më tej: “Unë, si drejtuese e kësaj prokurorie, kam lindur dhe banoj në Pukë dhe disa procedime penale, të cilat aktualisht janë në ndjekje nga kjo prokurori, si edhe me të arrestuar, unë e kam të pamundur që të ushtroj funksionet e prokurorit për shkak të lidhjeve fisnore”.
Prokuroria e Pukës është përdorur nga Kryeprokurorja e Përkohshme si një vend “internimi”. Ajo, siç deklaron edhe Elidiana Kasaj, ka komanduar herë pas here në atë institucion, prokurorë “rebelë”, të cilët nuk pranonin diktatin e saj.
Pasi afroi drejt Tiranës dy nga miqtë e saj, të cilët ishin emëruar në Prokurorinë e Pukës, Arta Marku i shfrytëzoi vendet bosh për “kundërshtarët”, mesa duket për t’i lënë të kuptojnë se çfarë do të thotë të jetosh në Pukë.
Kryeprokurorja e Përkohshme, Arta Marku, sipas biografisë së saj zyrtare, ka lindur në Fushë-Arrëz, zonë administrative që përfshihet në qytetin e Pukës dhe i njeh shumë mirë vështirësitë klimatike dhe sociale të asaj zone.
Pasi u dha fund “internimeve”, Arta Marku vendosi më në fund që të mos merret më me Prokurorinë e Pukës, duke e lënë për thuajse dy muaj gati inekzistent. Tashmë, në bazë të kërkesës së Elidiana Kasaj, pritet që KLP të marra masa të menjehërshme për të plotësuar organikën dhe për ta vënë në funksion prokurorinë e Pukës.
Deri në krijimin e Këshillit të Lartë të Prokurorisë, kompetencat për caktimin e përkohshëm të prokurorëve i mori përsipër Arta Marku. Përkundër deklarimeve të saj në Parlament se nuk do të kryente asnjë transferim të paligjshëm, Kryeprokurorja e Përkohshme e shndërroi institucionin në një “organizëm të lëvizshëm” përsa i përket politikës së kuadrit. Dhe këto lëvizje ishin aq të çoroditura, të tilla që detyrojnë drejtuesen e Prokurorisë së Pukës t’i lutet Këshillit të Lartë të Prokurorisë që të ndërhyjë me urgjencë për ta vënë atë strukturë në punë.
