Ministrja e re e Arsimit Besa Shahini është larguar në mënyrë demostrative nga komisioni i Edukimit, ku sot po diskutoheshin problemet e studentëve dhe ndaj saj kishte një sërë pyetjesh nga ana e deputetëve të opozitës. Shahini i ka bërë të ditur kryetares së komisionit, Albana Vokshit, se pyetjet mund t’ia drejtonte me shkrim dhe është larguar pa e kthyer kokën pas.
Ky qëndrim ka ardhur pas deklaratës së prerë së Vokshit se “ne nuk do të heqim dorë nga kërkesat e studentëve. S’e kuptoj pse kolegët e mazhorancës qeshin. Ato janë të parët për ne. Qindra studentë janë të ngujuar, qindra pedagogë dërgojnë ultimatum.”
Në vijim, Vokshi i ka kërkuar ministres Shahini të mbajë shënim, sepse kishte mbi 20 pyetje për t’i drejtuar: “Zonja ministre, a po e nisni ju detyrën duke shkelur ligjin për Arsimin parauniversitar? Duke zhvendosur mësimin nga fakultetet në shkollat e mesme? A jeni dakord që vajza të vogla 14-15 vjeçare, të zhvillojnë mësimin në të njejtin ambient me studentët që janë të rritur? A nuk duhet një marrëveshje?”
Pas kësaj, ministrja tha: “Zonja Vokshi, a mund të m’i dërgoni me shkrim pyetjet? Mund t’i përgjigjem në një kohë të mëvonshme. Ditën e mirë! – dhe Besa Shahini u largua nga salla.
Vokshi, duke e konsideruar këtë sjellje “një skenar të mazhorancës”, tha: “Kjo është e turpshme! I gjithë opinioni e shikon tani se kë ka vënë ministre tani Edi Rama!”
