Studentët që lëkundën Ramën dhe taborrin e tij otoman qeverisës me protestat e tyre, paralajmërojnë rikthim edhe më të vendosur kundër qeverisë. Pasi janë njohur me 11 VKM dhe 4 vendime të bërë publike dje nga kreu i qeverisë, që sipas tij i jepte zgjidhje përfundimtare tetë kërkesave të studentëve, Lëvizja për Universitetin e konsideron vendim të vonuar dhe për më shumë “hileqar”.
Duke analizuar vendimet dhe tetë kerkësat e protestuesve studentë, Lëvizja për Universitetin i nxjerr në shesh disa mashtrime të ulëta të kreut të qeverisë. Asnjë nga pikat e konsideruara nga Rama sit ë zgjidhura nuk është plotësuar sipas studentëve.
Është vetëm një “makiazh” i lehtë qeveritar, synimi i së silës nuk është zgjidhja e problemit të studentëve, por sfumimi i protestave që për 19 ditë revoltë shkundën nga themelet qeverisjen “Rama 2”.
Qëndrimi i Lëvizjes për Universitetin: SHUMË PAK, SHUMË VONË, ME HILE…
Gjatë daljes së sotme publike, kryeministri Rama nuk habiti askënd me refuzimin e tij për t’u dhënë zgjidhje substanciale kërkesave të studentëve:
- Shumica dërrmuese e studentëve të masterit do të vazhdojë të paguajë tarifa vjetore nga 60,000 deri në 115,000 lekë (të reja) në vit.
- Pesha e fuqisë studentore në zgjedhjen e autoriteteve drejtuese të universitetit do të mbetet në 10% mjeran. Vota e një pedagogu do të vijojë të vlejë rreth 300 herë më shumë se ajo e një studenti. As Rama e askush tjetër nuk ka mundësi të marrë në shqyrtim mbi 20’000 universitetet e kësaj bote. Mirëpo ka plot raste ku pesha e votës studentore është më e lartë se 10%. Një shembull mund të ishte Universiteti Autonom i Barcelonës.
- Bordet e Administrimit të universiteteve do të vazhdojnë të kontrollohen nga qeveria. Premtimi se një prej përfaqësuesve të qeverisë do të zgjidhet prej 3 propozimeve që vijnë nga strukturat përfaqësuese të studentëve është hileqar. Çdo qeveri i ka aq në dorë strukturat burokratike studentore (këshillat studentorë) sa për të futur një vegël të saj në listën 3-emërore.
- Qeveria nuk ka treguar se sa do të rritet buxheti i shtetit për arsimin e lartë. Rama tha se në vitet në vijim do të ketë ulje të ndjeshme të kuotave për studimet bachelor në universitetet publike. Çdo ulje tarifash bachelor-i do të shoqërohet me ulje të numrit të studentëve, çka nënkupton se financimi shtetëror për universitetet publike nuk do të ndryshojë ndjeshëm.
- Në kushtet ku diplomoret private lulëzojnë, çdo ulje kuotash në universitetet publike nuk do të zgjidhë “mbiprodhimin” e gazetarëve apo juristëve, por thjesht do t’i shtyjë kandidatët për gazetarë dhe juristë drejt diplomoreve private, duke sjellë miliona euro shtesë për pronarët e tyre.
- Mbi të gjitha, qeveria konsideron të panegociueshëm jo vetëm rrëzimin e ligjit të arsimit të lartë, por edhe ndryshimin e pjesshëm të tij:
- Universitetet publike do të vazhdojnë të vuajnë nga pasiguria financiare, e cila sjell me vete rritjen abuzive të kuotave të studimeve master, lëshimin e notës dhe komercializimin e jetës universitare.
- Diplomoret private do të kenë sërish mundësi të fusin duart në buxhetin e shtetit.
- Tarifat e studimeve mund të rriten që vitin e ardhshëm si rezultat i pakësimit të buxhetit për universitetet publike.
- Universitetet do të vazhdojnë të jenë të varura nga qeveria dhe të pavarura nga studentët.
Për të gjitha këto arsye, protestat duhet të vazhdojnë dhe të bëhen më masive deri në PLOTËSIMIN E TË GJITHA KËRKESAVE STUDENTORE DHE RRËZIMIN E LIGJIT TË ARSIMIT TË LARTË.
STUDENTËT E BASHKUAR KANË PËR TË FITUAR!
