Dëborë që ka bllokuar zonën turistike të Thethit në veri të vendit, përveç vështirësive në qarkullim i ka lënë banorët prej dy javësh edhe pa energji elektrike.
Zona e Thethit vijon të jetë e bllokuar prej dy javësh nga dëbora e cila ka arritur një trashësi prej rreth 80 cm, ndërkohë që autoritetet deri tani nuk kanë ndërhyrë për të hapur rrugën.
Banorët apelojnë për ndihmë nga shteti duke u bërë thirrje instancave përkatëse që të bëjnë të mundur hapjen e rrugëve.
Bllokimi i rrugës nga dëbora përveç të tjerave ka lënë pa punë edhe rreth 300 bujtina turistike në Theth.
Ndërkohë bëhet me dije se akset e tjera në Razëm dhe Bogë janë të kalueshme pa probleme por këshillohen drejtuesit e mjeteve që të kenë zinxhirë.
Reshje dëbore kanë rënë ditët e fundit edhe në disa zona të tjera të vendit, por nuk raportohet për probleme në qarkullim.
