Nga Boldnews.al
Mbledhja e kryesisë së Partisë Socialiste në fillim të kësaj jave u shndërrua në një “gjyq publik” për të rinjtë e Forumit Eurosocialist (FRESH), duke u konsideruar ata si përgjegjës për dështimin e qeverisë së Edi Ramës përballë studentëve.
Mbledhja e drejtuesve të lartë të PS ishte e mbyllur, por burime brenda saj shpërndanë në media se fokusi kryesor i takimit ishte fakti se përse FRESH nuk ka informuar partinë për problemet e studentëve.
Ky “gjyq publik” ishte paradoksal, pasi të rinjve socialistë u kërkohej llogari se përse nuk kishin arritur të mbyllnin zullumet e kryeministrit dhe vartësve të tij, të cilët jo vetëm që nuk kanë punuar për përmirësimin e kushteve të studentëve por, për më tepër, me një ligj klientelist për Arsimin e Lartë, e rënduan rininë universitare me tarifa të papërballueshme.
Edi Rama, mesa duket, ka menduar që të përdorë drejtuesit e FRESH si “sigurisë”, e cila “duhet të digjet” për të mbrojtur qeverinë. Por, kjo tentativë nuk besohet se do e shpëtojë qeverinë e Ramës nga kostot e vendimmarrjes së gabuar dhe abuzive.
Burime nga mbledhja e Kryesisë së Partisë Socialiste nuk përmendën që të jetë kritikuar Ministrja e Arsimit, Lindita Nikolla. Ajo personalisht dhe dikasteri i saj janë përgjegjësit formal për hartimin e ligjit abuzit të Arsimit të Lartë. Por, fakti që Nikolla nuk është prekur deri më tani, dëshmon se ajo ishte thjesht një levë për të hartuar ligjin e Arsimit të Lartë, përfitimet e të cilit do i merrnin njerëz të afërt e bashkëpunëtorë “akademikë” me kryeministrin.
Në mbledhje nuk ka pasur asnjë kritikë edhe për kryetarin e Bashkisë së Tiranës, Erion Veliaj, i cili është përgjegjës i drejtëpërdrejtë për mos-ndërtimin e Kampusit Universitar në Tiranë. Në atë territor, për të cilin “Lali Eri” premtoi në fushatë se do ngrinte kampusin, sot është një parkim publik, të ardhurat e të cilit shkojnë në arkat e institucionit që drejton Veliaj.
Në mbledhje, natyrisht, as nuk pritej të kishte kritika për vetë Edi Ramën, i cili është personi përgjegjës për gjendjen e vështirë të studentëve, si edhe për keq-menaxhimin e protestës së studentëve.
Manifestimi paqësor dhe këmbëngulës 10-ditor i të rinjve kryesisht në Tiranë, por edhe në qytete të tjera të vendit, grisën maskën propagandistike të qeverisjes së Edi Ramës. Ai dëshmoi se problemi i tij më i madh nuk është protesta në vetëvete, por efektet në imazhin e tij, të cilin është kujdesur ta kurojë maksimalisht nëpërmjet medias që e kontrollon thuajse plotësisht.
Ndaj, përgjegjësitë për prishjen e imazhit po synon t’ia ngarkojë të rinjve të FRESH-it, me argumentin absurd që “nuk kanë raportuar për problemet e studentëve”. Ky argument tregon më së miri se qeveria dhe qeverisja e Edi Ramës është shumë larg shqetësimeve dhe problemeve të qytetarëve.
Edi Rama dhe kupola e tij e vogël dhe klienteliste qeveritare ka synuar që, zullumet e tyre të mbulohen nga FRESH. Por, eurosocialistët e Rilindjes nuk kanë arritur të përmbushin këtë detyrë, pasi është një mision i parealizueshëm. Nuk ka pinjoll socialist që të bindi studentët se rritja e tarifës është gjë e mirë. Nuk ka Rilindas të ri që të bindë bashkëmoshatarët e tyre se të jetosh në kushte mesjetare në konvikte është “tendencë”.
E, megjithatë, mbledhja e Kryesisë së Partisë Socialiste duket se e gjeti “armikun e brendshëm”-ai është mes Freshistëve, të cilët edhe u keqpërdorën deri në bajatosje në “dialogjet” e Edi Ramës në salla universitare e në studion e Top Show-t.
