9 muaj pas vdekjes së Davide Astorit për herë të parë ka folur nëna e tij.
Në një intervistë për “Sportmediaset”, Anna ka shpjeguar ndjenjën e “paralizuar” të mëngjesit të 4 marsit kur mori lajmin e korbshëm.
Nëna e ish-kapitenit të Fiorentinës kërkon që testet mjekësore të jenë më të avancuara pasi kështu do parandaloheshin rastet e tilla.
“Unë e dua një ‘pse’, nuk dua fajtor, sepse jam e sigurt që fajtori nuk ekziston”, ka thënë ajo.
“Kam dy fëmijë të tjerë, jam një nënë dhe duhet të jem e fortë për ata. Atë mëngjes se bashku me burrin duhet të shkonim në meshë dhe pastaj të votonin, sepse ishin zgjedhjet. U zgjova, isha si e paralizuar, kisha të ftohtë, isha e zbrazët, një ndjenjë që nuk e kisha përjetuar kurrë më parë në jetë time. Ende nuk dija asgjë”, ka rrëfyer Anna.
“Ajo që ndodhi ishte një fatkeqësi, askush nuk e ka dëshiruar, por në të njëjtën kohë dua që kjo mos t’i ndodh askujt. Dua që asnjë nënë të mos e përjetojë kurrë atë që kam përjetuar unë.
“Në Itali kontrollet teknike për sportistë janë shumë të mira, por duhet të përmirësohen ende më shumë. Dua që sakrifica e Davides tim mos të jetë e padobishme”, ka thënë nëna e Astorit.
Kujtojmë që autopsia doli në konkluzionin se vdekja e 31-vjeçarit kishte ardhur si pasojë e një arresti kardiak.
