Qeveria e Shteteve të Bashkuara zyrtarisht është mbyllur pjesërisht pasi Kongresi ka shtyrë miratimin e buxhetit.
Mbyllja e pothuajse 25 për qind të Qeverisë do të thotë se disa prej agjencive kryesore kanë pezulluar operacionet e tyre prej 22 dhjetorit.
Mbyllja e Qeverisë erdhi pasi senatorët republikanë dhe demokratë dështuan që të arrijnë një marrëveshje mbi shpenzimet.
Presidenti amerikan, Donald Trump është zotuar se nuk do të nënshkruajë asnjë ligj për buxhetin, i cili nuk përfshinë 5 miliardë dollarë për ndërtimin e murit në kufirin ndërmjet SHBA-së dhe Meksikës.
Demokratët kundërshtojnë fuqishëm ndërtimin e murit dhe kanë thënë se do të votonin buxhetin, nëse në të nuk përfshihen fondet për ndërtimin e murit.
Zyrtarët vlerësojnë se 800 mijë punonjës federalë ose do të përjashtohen përkohësisht nga puna ose do të detyrohen që të punojnë pa u paguar menjëherë.
Mbyllja e Qeverisë do të prekë stafin e NASA-s, Departamentit të Tregtisë, Departamentit të Shtetit, Departamentit për Siguri Kombëtare, Drejtësisë dhe Bujqësisë.
Parqet nacionale pritet të mbesin të hapura, por shumica e punonjësve në këto parqe nuk do të punojnë.
Senati më herët gjatë javës në mënyrë unanime miratoi Projektligjin për shpenzimet pa përfshirë fondet për ndërtimin e murit në kufi dhe e dërgoi këtë projektligj në Dhomën e Përfaqësuesve. Por, Dhoma e Përfaqësuesve përfshiu në të edhe paratë për ndërtimin e murit dhe e ridërgoi në Senat, ku nuk kishte vota të mjaftueshme për t’u miratuar.
Si Senati, ashtu edhe Dhoma e Përfaqësuesve pritet që në mesditën e 22 dhjetorit të mbajnë seancë, ku do të tentojnë të arrijnë marrëveshje.
Më 21 dhjetor, presidenti Trump ka shkruar në Twitter se ai shpreson që mbyllja e Qeverisë nuk do të zgjasë shumë.
“Shpresoj që mbyllja të mos zgjas shumë”, ka shkruar ai, duke insistuar se “kombi ynë duhet të ketë siguri në kufi”.
Trump kërcënon me mbyllje të gjatë të Qeverisë, ja kushti që ka vendosur
Presidenti amerikan, Donald Trump ka kërcënuar me mbyllje “shumë të gjatë” të Qeverisë në rast se demokratët nuk financojnë premtimin e tij për ndërtimin e murit në kufi me Meksikën.
Në një seri të postimeve në rrjetin social, Twitter, Trump ka kërkuar 5 miliardë dollarë, shumë e cila është miratuar në Dhomën e Përfaqësuesve, mirëpo pritet të dështojë në Senat.
Në rast nuk arrihet asnjë marrëveshje, disa pjesë të Qeverisë amerikane do të mbyllen në mesnatën e së premtes.
Një mbyllje e tillë e pjesshme do të shënonte herën e tretë që ndodh një gjë e tillë në agjencitë federale më 2018.
Përmes një postimi të premten mbrëma në Twitter, Trump ka akuzuar demokratët për siç ka thënë “tentim të zhvlerësimit të konceptit të murit, duke e quajtur të modelit të vjetër”.
“Është fakt që asgjë tjetër nuk do të funksionojë dhe se ka qenë fakt i vërtetë për mijëra vjet. Është sikurse rrotë, nuk ka asgjë më të mirë”, ka thënë Trump.
“Nëse demokratët votojnë kundër, do të ketë mbyllje që do të zgjasë një kohë të gjatë”, është shprehur ai.
Përveç tjerash, Trump ka shtyrë edhe pushimet e tij në Florida edhe sipas ndihmësve të tij, ai i ka bërë thirrje liderit të repulikanëve në Senat, Mitch McConnell për të përdorur të ashtuquajturën “mundësi bërthamore”.
E ashtuquajtura “mundësi bërthamore” do të lejonte miratimin e buxhetit me një shumicë të thjeshtë prej 51 votave, në vend të 60 votave të kërkuara. REL
