Detajet te reja nga atentati me tritol mbreme, kur u hodh në erë makina personale e shoferit të ambulancës në Orikum.
Ngjarja e rëndë ka tronditur qytetin e Orikumit mbrëmjen e së enjtes. Bëhet fjalë për një shpërthim me tritol. Në shënjestër ka qenë makina e Vezir Bellos.
59-vjeçari nuk ka qenë në automjet në momentin e shpërthimit dhe bëhet fjalë për dëme materiale. Bello prej vitesh punon si shofer ambulance, mësohet nga Policia.
Grupi hetimor që po punon për zbardhjen e ngjarjes dhe identifikimin e autorëve, bën të ditur se bëhet fjalë për një shpërthim me një sasi të konsiderueshme lënde plasëse.
Paraprakisht, dyshohet se gjithçka është një sinjal për 59-vjeçarin, ndërkohë që pritet marrja në pyetje e këtij të fundit për të mësuar diçka më shumë lidhur me shkakun e këtij sulmi. Nga hetimet e deritanishme mësohet se shpërthimi ka ndodhur para oborrit të banesës së 59-vjeçarit, aty ku ishte parkuar automjeti i tij personal.
Ekspertët janë duke kryer verifikimet e nevojshme për të përcaktuar shkakun e shpërthimit, ku përveç tritolit nuk përjashtohet që shpërthimi të ketë ardhur për ndonjë shkak tjetër.
“Rreth orës 19:30, në Orikum ka ndodhur një shpërthim në rrethana ende të paqarta, në automjetin tip ‘Ford’ në pronësi të shtetasit V.B., 59 vjeç, të cilin e kishte parkuar pranë banesës. Si pasojë e shpërthimit janë dëmtuar xhamat edhe të një mjeti tjetër, i parkuar në afërsi”, bëhet e ditur nga Policia
