Nga Boldnews.al
Kryeprokurorja Arta Marku u çertifikua nga Operacioni Ndërkombëtar i Monitorimit si një juriste me aftësi minimale profesionale. Por, edhe ajo, megjithë nivelin e ulët të dijeve, sërish mund të qeshë me letrën që i ka dërguar së fundmi kryetarja e Lëvizjes Socialiste për Integrim, Monika Kryemadhi, nëpërmjet të cilës i kërkon pezullimin e punimeve të Unazës së Re.
Letra e Kryemadhit, natyrisht është hartuar për të fituar pikë politike tek banorët e Unazës së Re, të cilët rrezikojnë shembjen e godinave të tyre nga projekti korruptiv për ndërtimin e Unazës së Madhe të Tiranës.
Por letra, nga ana tjetër, përmban edhe kërkesa të natyrës juridike, të cilat, Kryemadhi, si votuese e ligjeve, duhet të kishte njohuritë më minimale.
Në mënyrë të përmbledhur, Kryemadhi i kërkon Arta Markut që të marrë vendimin për të pezulluar punimet në Unazën e Re, duke qenë se kompania fituese e tenderit ka fallsifikuar dokumentat.
Pikërisht, kjo kërkesë dëshmon për “injorancën në fushën e ligjit” të Monika Kryemadhit, e cila, si një deputete e Kuvendit të Shqipërisë, më së paku duhet të kishte lexuar Kushtetutën dhe ligjet e Reformës në Drejtësi.
Po i marrim me radhë:
Së pari, Monika Kryemadhi ia drejton kërkesën Prokurores së Përgjithshme (të Përkohshme), të cilën e konsideron si autoritetin që po zhvillon hetimin për skandalin e fallsifikimit të dokumentave të përdorur në tenderin e Unazës së Re.
Por, Prokurori i Përgjithshëm, edhe ai i Përkohshëm, nuk kanë kompetencë që të nisin apo të kontrollojnë hetime. Këtë parashikon Kushtetuta, e miratuar në Korrik 2016, për të cilën ka votuar pro edhe vetë Kryemadhi. Decentralizimi i institucionit të Prokurorisë është parashikuar edhe në ligjet e tjera të Reformës në Drejtësi.
Së dyti, Kryemadhi kërkon nga Prokurorja e Përgjithshme (e Përkohshme) pezullimin e punimeve. Legjislacioni shqiptar, ashtu si edhe në të gjithë vendet demokratike të botës, ia ngarkon gjykatës të drejtën për pezullimin e veprimeve të caktuara, përfshirë edhe vijimin e punimeve, si në rastin konkret.
Në vijim, “Boldnews.al” po ofron disa këshilla të thjeshta juridike, natyrisht falas, për çdo politikan që tenton të ndërmarrë veprime populiste me çështjet hetimore.
Fillimisht, kërkesa të ndryshme për hetimet penale i drejtohen prokurorit të çështjes. Paketa e reformës në drejtësi ka përcaktuar se prokurori është i pavarur nga çdo autoritet për çështjet hetimore. Pra, edhe nëse do të ketë vullnet Prokurori i Përgjithshëm apo kushdo zyrtar drejtues prokurorie për të marrë në konsideratë një kërkesë, në asnjë mënyrë nuk mund të detyrojë prokurorin e çështjes që të zbatojë urdhërin apo porosinë e tyre. Kjo është Reforma në Drejtësi.
Tjetër, nëse kërkohet pezullimi i një veprimtarie të caktuar (si, fjala vjen, ndërtimi i Unazës së Re), prokurorit, maksimumi mund t’i kërkohet që t’i kërkojë gjykatës pezullimin e punimeve, pasi të ketë nisur një hetim penal.
E, mbi të gjitha, politikanët, në kërkesat e tyre, duhet të kenë parasysh edhe një parashikim tjetër të Kodit Penal. Konsiderohet vepër penale çdo lloj ndërhyrje në hetimin që po zhvillon prokurori.
