Takimi i organizuar në Bruksel mes krerëve më të lartë të Kosovës dhe BE-së nuk ka kaluar pa tensione mes palëve. Debatet nisën kur kryeministri Haradinaj kritikoi BE për mos-liberalizimin e vizave duke neglizhuar qytetarët e Kosovës.
“Edhe pse Kosova zbatoi të gjitha 95 kriteret e paracaktuara siç është konfirmuar nga Komisioni në maj, reflektimi që marrim nga BE, është i thyer dhe i pashpresë. Edhe përkundër angazhimit të plotë në Agjendën e Reformës Europiane(ERA), dhe reformave të fuqishme të ndërmarra për të fuqizuar sundimin e ligjit dhe institucionet e tij, ne ndihemi të tradhtuar dhe të zhgënjyer nga BE”, pohoi Haradinaj.
Kritikat acaruan shefen e politikës së jashtme të Bashkimit Evropian, Federica Mogherinin. Pas takimit në Bruksel, fytyra e saj dukshëm tregon se nuk ka kaluar një ditë të mirë.
Haradinaj ka insistuar që nuk do ta heqë taksen 100% ndaj mallrave serbe dhe atyre nga Bosnja e Hercegovina edhe pas presionit të BE-së.
Tensionet u reflektuan në faktin se në fund, delegacionet anuluan konferencën e planifikuar për tu mbajtur pas takimit.
