Propaganda qeveritare po mundohet të bindë publikun se protesta e studentëve është shuar dhe tashmë ka mbetur vetëm një grup i vogël që kundërshton dialogun me kryeministrin Edi Rama.
Por një debat i drejtoreshës së gjimnazit ‘Sami Frashëri’ në Tiranë, me senatorët e të gjitha klasave, tregoi përmasat që ka realisht kjo protestë.
Nga 1000 nxënës që ka ‘Sami Frashëri’, 700 prej tyre kishin braktisur mësimin për t’u bërë pjesë e protestës. Kjo shifër u konfirmua në debat nga vetë drejtoresha.
70% e nxënësve të këtij gjimnazi protestuan dje përpara Kryeministrisë dhe Ministrisë së Arsimit, për të kërkuar zbatimin e tetë kërkesave.
Një tjetër moment interesant në debatin e drejtoreshës me senatorët, ishte se këta të fundit kishin kurajën për pranuar pjesëmarrjen në protestë, edhe në ditët e ardhshme, edhe pse u kërcënuan direkt me mungesa dhe për rrjedhojë me përjashtim nga shkolla.
‘Sami Frashëri’ nuk është gjimnazi i vetëm që i është bashkuar protestës, të njëjtin vendim kanë marrë edhe nxënësit e gjimnazeve të tjera.
Ndërkohë, sot studentët dhe gjimnazistët kanë lajmëruar për protestë masive përpara Kuvendit.
