Superiorja ka ende dy javë për të zhvilluar përpara mbylljes së fazës së dytë, por se thuajse të gjithë klubet janë me mendjen nga merkatoja e janarit. Ky nxitim vjen si pasojë e gabimeve të bëra në merkaton e verës apo edhe nevojave që kanë ekipet për përmirësime në reparte të ndryshme.
Lidhur edhe me situatën e fundit të shfaqur te skuadra e Luftëtarit, bluzinjtë janë epiqendra për shumë ekipe që synojnë të përfitojnë elementë të rëndësishëm prej tyre. Së fundmi, Tirana është një prej ekipeve që kërkon ta shfrytëzojë situatën dhe “Panorama Sport” ka mësuar se Vasil Shkurtaj është një prej emrave të synuar.
KONTAKTI – Gazeta mëson se Tirana ka kontaktuar me sulmuesin për t’u interesuar rreth të ardhmes së tij dhe për të parë nëse ekziston mundësia që të dalë i lirë në merkaton e janarit, pikërisht një ditë para sfidës mes Luftëtarit dhe Tiranës. Të nesërmen, sulmuesi u shënoi kryeqytetasve. Nisur nga periudha e mungesës së financave te gjirokastritët dhe afatit që mund të nxjerrë të lirë të gjithë lojtarët bluzinj (nëse kalojnë 3 muaj, pa u paguar kanë automatikisht të drejtën që të jenë të lirë), bardheblutë kanë nxituar të interesohen për shërbimet e Shkurtajt.
REAGIMI – Pasi ka dëgjuar interesimin e skuadrës kryeqytetase, Shkurtaj ka reaguar menjëherë dhe mësohet se u ka thënë që është profesionist dhe interesimi duhet të kalonte nga klubi bluzi, duke njoftuar drejtuesit e Luftëtarit. Vetë futbollisti i ka vënë në dijeni për bisedën dhe interesimin e shfaqur në adresë të tij, duke treguar respekt në lidhje me kontratën që ka nënshkruar me Luftëtarin. Nga sa bëhet me dije, veprimi i sulmuesit mund të jetë një lloj “driblimi” me shumë stil dhe finesë, por mund të përkthehet ndryshe edhe si një presion indirekt në adresë të klubit që të reagojë për situatën.
ÇËSHTJA “NGO” – Konflikti me trajnerin Mema që në ditët e para të këtij të fundit në krye të Tiranës, pezullimet dhe gjobat e përsëritura dhe së fundmi interesimi për një tjetër sulmues janë tregues të qartë se Tirana po i bën dalje sulmuesit anglez. Tentativa për të afruar një sulmues si Shkurtaj, tregon se bardheblutë nuk kanë më besim maksimal se Ngo mund të mbajë peshën e sulmit, ndaj është sinjal i qartë kundrejt sulmuesit se nuk është i pari në listën e planeve të 24 herë kampionëve për majën e sulmit për pjesën e mbetur të sezonit
