Pas dy javësh trajtimi shëndetësor në një spitali të kryeqytetit turk, Ankarasë, mësohet se 24 vjeçarja oficere e forcave “Shqiponja”, Ina Nuka, e cila prej plasjes së një kapsolli në dorë humbi njërin nga gishtërinjtë, ndodhet në gjendje të mirë shëndetësore.
Nuka u plagos në protestën e 22 Nëntorit, gjatë gjatë përplasjeve përpara Parlamentit midis banorëve që preken nga projekti i “Unazës së Madhe” dhe policisë.
Pas dy ndërhyrjeve që janë kryer deri tani të cilat kanë rezultuar të suksesshme, pritet një ndërhyerje tjetër javën e ardhshme.
Ndërhyrja e rradhës do të bëhet për të zëvendësuar gishtin e madh të dorës së saj.
Kujtojmë se oficerja e policisë, Ina Nuka u përpoq të hiqte nga qafa një kapsoll të hedhur prej banorëve të Astirit gjatë protestës së tyre përpara Parlamentit. Gjatë momentit që po largonte kapsollin, ai i plasi në dorë, duke i shkaktuar asaj pasoja, siç ishte humbja e gishtit.
Për ngjarjen e ndodhur rreth dy javë më parë si autor i saj akuzohet 18 vjeçari Daniel Dobraj. Hetimet janë ende në proces, pasi gjykata ende nuk ka dhënë një vendim përfundimtarë.
