Prokuroria e Vlorës ka regjistruar hetimin për 4 dosje penale pas denoncimeve për 22 persona të zhdukur në këtë qytet gjatë 3 viteve të fundit. Të dhënat e policisë së Vlorës tregojnë se për 14 prej këtyre personave nuk ka asnjë adresë, ndërkohë që për tetë të tjerë ka të dhëna konkrete për vendndodhjen e tyre.
Sipas sistemit TIMS, Majlinda Koçi e larguar më 5 mars 2018, figuron në TIMS në Greqi, ndërsa dyshohet se vuan nga çrregullime mendore. Po kështu, sipas sistemit TIMS, Shpëtim Pasha, i larguar në 2015, figuron se ndodhet në Itali.
Për shtetasin Saimir Pashaj, i zhdukur në 2 nëntor 2018, dyshohet se ndodhet i arrestuar pasi është dënuar disa herë për vjedhje. Referuar të dhënave nga sistemi TIMS, edhe shtetasja Teuta Pasha, e larguar më 2015, figuron se ndodhet në Greqi.
Një emër tjetër në listë është ai i Edmond Durmishit, i larguar nga spitali Psikiatrik, i cili është kthyer ne banesën e familjes së tij në Memaliaj.
Edhe shtetasi Eduard Habibi, i larguar në 19 maj 2018, sipas policisë është rikthyer në banesë. Një tjetër person në listën e të zhdukurve, Fatos Sulaj, i larguar më 1 qershor 2018, dyshohet se ndodhet në Greqi.
Prokuroria po heton si vrasje rastin e Albano Xhaferrit, pas dëshmisë në policinë e Fierit nga Gazmir Merkaj, i cili ka rrëfyer përfshirjen e tij në planet për rrëmbimin dhe ekzekutimin e 32-vjeçarit nga Vlora.
Në hetim është edhe rasti Elvis Troqe, ku policia ka arrestuar pronarin e mjetit me të cilin është larguar 24-vjeçari. Besart Zharra gjendet aktualisht në ambientet e paraburgimit të Vlorës, ku fillimisht ka mohuar që makina në kamera të jetë në pronësi të tij.
I pyetur më pas për automjetin me targa AA 730 JO, Zharra ka thënë se nuk e njeh Elvis Troqen dhe se nuk i ka ndryshuar asgjë automjetit nga dita kur e ka blerë.
Por nga imazhet e gjetura në telefonin e tij personal, rezulton se makina ka pasur karakteristika të njëjta me ato të fiksuara nga kamerat e sigurisë në momentin e rrëmbimit të Elvis Troqes.
Prokuroria aktualisht është duke administruar akt-ekspertimin e materialeve gjenetike të gjetura në automjet, ndërsa Besart Zharra është lënë nga Gjykata e Apelit në burg, për veprën penale “të rrëmbimit ose mbajtjes peng të personit, në bashkëpunim”.
Rasti i tretë në hetim është ai i Adrian Jahos dhe Ariseldo Mazes, të cilët janë larguar në det nga Durrësi mëngjesin e 7 korrikut të 2017-ës. Të dy shtetasit e zhdukur janë proceduar më parë për akuzën e trafikut të lëndëve narkotike.
Një dosje më vete është regjistruar edhe për rastin e Leonard Mehmetit, i njohur me pseudonimin Nani. Kontaktet telefonike të këtij personi, tregojnë si vendndodhje të fundit Shijakun.
Ndërkaq, sipas prokurorisë, nga 22 personat e denoncuar të zhdukur, vetëm 5 rezultojnë se kanë qenë të skeduar me narkotrafikun.
Në hetim është edhe rasti i të larguarit nga banesa Gestian Çollaku, por ky i fundit dyshohet se i fshihet drejtësisë, pasi është shpallur në kërkim për veprën penale të “plagosjes së rëndë me dashje”.
