Publikimi i doktoraturës-plagjiaturë të ministres Ogerta Manastirliu ka shkaktuar skandal, ndërsa prej 48 orësh, ka pasur debate dhe pista mbi “dorën” që kishte kryer këtë zbulim mbi ministren.
Qarkulloi ideja se ky mund të ishte një sulm i motivuar politikisht nga brenda llojit, por disa të dhëna sugjerojnë se sulmi mund të jetë vërtetë brenda llojit, ama jo i llojit partiak-politik, por i llojit institucional.
Aktualisht në QSUT po zhvillohet konkursi për zgjedhjen e shefit të pavionit të kardiokirurgjisë dhe pritet që ministrja të firmosë përzgjedhjen e shefit të këtij pavioni orët në vijim.
Ndonëse është një garë larg vëmendjes së publikut, ndërhyrjet dhe tensioni mes kandidatëve ka shkaktuar dhe një lloj “lufte klanesh”.
Pikërisht mbi njërin prej kandidatëve për shef pavioni kanë rënë dyshimet së fundmi. Bëhet fjalë për zotin Edvin Prifti, i cili aktualisht është shefi i pavionit të kardiokirurgjisë dhe kërkon të rizgjidhet në të njëjtin post.
Një burim i mirëinformuar i tha Hashtag.al se bashkëpunëtorët e kanë informuar ministren Manastirliu mbi një lidhje “pikante” të zotit Prifti.
“Ministrja është informuar së fundmi mbi miqësinë dhe bashkëpunimin e gjatë të kardiologut Edvin Prifti me ish-zv/ministrin e dorëhequr Taulant Muka. Ky i fundit, është bërë personazh i njohur që kur nisi të denonconte plagjiaturat e disa zyrtarëve publikë dhe më pas u emërua zv/ministër i Arsimit, për të dhënë dorëheqjen dy javë pasi nisi detyrën e re.
Bashkëpunëtorët e ministres dyshojnë këtë dyshe si dirigjues të sulmit ”, – tha i njëjti burim.
Në disa dalje televizive zoti Muka dhe kardiologu Edvin Prifti kanë qenë të ftuar sëbashku në panele ku diskutohej për plagjiaturën, ndërsa gjatë një interviste Taulant Muka e ka përmendur kardiologun Edvin Prifti si një studiues serioz.
Videoja në vijim paraqet momentin kur Taulant Muka e përmend mikun e tij Edvin Prifti gjatë intervistës:
Dy ditë para se të publikohej plagjiatura e ministres Ogerta Manastirliu, në komisionin që zhvilloi konkursin për shefin e kardiokirurgjisë , pranë komisionit është paraqitur një ankesë ndaj kirurgut Edvin Prifti.
Ankesa vinte në dijeni komisionin, se kandidati Prifti nuk plotësonte kriteret për tu pranuar në konkurs, pasi ai nuk kishte certifikuar dhe njëhësuar diplomën dhe certifikatën e specializimit që kishte kryer në Itali.
Ankesa theksonte se mungesa e njëhësimit të diplomës dhe specializmit ngre dyshime mbi vërtetësinë e saj, përveçse shkel një nga kriteret bazë të konkursit.
Është pikërisht kjo ankesë ndaj Edvin Priftit që duket se ka tensionuar më tej situatën mes kandidatëve, ndërsa janë bashkëpunëtorët e vet ministres Manastirliu që ‘off record’, kanë pranuar për Hashtag.al se dyshojnë që publikimi i plagjiaturës ka qenë sinjal që lidhej me vendimmarrjen e saj në orët në vijim, mbi zgjedhjen e shefit të pavionit të kardiokirurgjisë./Hashtag.al
