Nga Boldnews.al
Prokurorja e Përgjithshme e Përkohshme, Arta Marku, ka vendosur të thërrasë Mbledhjen e Përgjithshme të Prokurorëve për përzgjedhjen e anëtarëve të Këshillit të Lartë të Prokurorisë, nëpërmjet një njoftimi që krijon disa pikëpyetje dhe paqartësi.
Arta Marku njofton të gjithë prokurorët e Republikës së Shqipërisë se duhet të mblidhjen në dt. 11 Dhjetor, ora 9.00, në një kompleks privat në bregdetin e Kavajës, ku do të votojnë për 6 anëtarët prokurorë të KLP-së.
Fillimisht, njoftimi zyrtar i Prokurorisë u shpërnda në rrjetin social facebook nga av. Alfred Balla, anëtar jo-prokuror, i përzgjedhur në Këshillin e Lartë të Prokurorisë vetëm me votat e Partisë Socialiste para pak muajsh.
Disa prokurorë, të kontaktuar nga “Boldnews.al” deklaruan se njoftimin për mbledhjen e kishin marrë fillimisht nga rrjetet sociale dhe më tej, mbrëmjen e së Martës ishin njoftuar zyrtarisht edhe nga Prokuroria e Përgjithshme.
Njoftimi i Kryeprokurores së Përkohshme mban datën 27.11.2018, ditë kur përfundoi procesi i Vetingut për kandidatin e fundit prokuror për Këshillin e Lartë të Prokurorisë, Besnik Cani, i cili u konfirmua në detyrë.
Gjithësesi, vendimi i Kryeprokurores së Përkohshme për të thirrur Mbledhjen e Përgjithshme të Prokurorëve mund të shkaktojë debate proceduriale.
Në fillim të vitit 2017, 19 prokurorë kandiduan për Këshillin e Lartë të Prokurorisë, ndër të cilët edhe Arta Marku, e cila në atë kohë ishte prokurore në Shkodër. Pasi u zgjodh në postin e Prokurores së Përgjithshme të Përkohshme, ajo dha dorëheqjen nga garimi për KLP, duke ulur numrin e garuesve në 18.
Gjatë procesit të Vetingut, 9 kandidaturave u rrëzuan, ndërkohë që pjesa tjetër u konfirmuan. Nga prokurorët e konfirmuar, vendimi për 4 prej tyre është ankimuar në Kolegjin e Posaçëm të Apelimit nga Komisioneri Publik. Konkretisht, ende nuk janë konfirmuar përfundimisht Besnik Muçi, Gentian Osmani, Antoneta Sevdari dhe Arben Dollapaj.
Pikërisht, për këta emra mund të krijohen pikëpyetje dhe debate pas vendimit të Kryeprokurores së Përkohshme për të thirrur Mbledhjen e Përgjithshme të Prokurorëve.
Ende është e paqartë nëse këta 4 kandidatë do të përfshihen në listën e votimit të kandidatëve prokurorë për në Këshillin e Lartë të Prokurorisë. Nëse nuk përfshihen, për shkak se nuk janë konfirmuar zyrtarisht me vendim të formës së prerë, atëherë kjo mund të konsiderohet një shkelje e rëndë e së drejtës së tyre për t’u zgjedhur.
Por, edhe nëse përfshihen, askush nuk mund të thotë sot se çfarë do të ndodh nëse ata përzgjidhen si anëtarë të Këshillit të Lartë të Prokurorisë dhe më tej të shkarkohen nga Kolegji i Posaçëm i Apelimit, për shkak të problemeve me Vetingun, siç pretendon Komisioneri Publik.
Këto pikëpyetje do të shuheshin nëse Kryeprokurorja e Përkohshme, Arta Marku, do të zgjidhte që të priste derisa Kolegji i Posaçëm i Apelimit (KPA) të jepte verdiktin përfundimtar edhe për 4 prokurorët e konfirmuar nga shkalla e parë e Vetingut, por që ende nuk konsiderohen të konfirmuar me vendim të formës së prerë, derisa të shprehet KPA.
