Tritan Shehu dhe Bardh Spahia, dy deputetët e Partisë Demokratike, me profesion mjekë, kanë vizituar pasditen e sotme personat e plagosur gjatë protestës së zhvilluar para Kuvendit.
Në një prononcim për mediat, Shehu tha se panë nga afër gjendjen e banorëve dhe policëve të cilët mbetën të plagosur, por shtoi se për shkak të etikës mjekësore nuk mund të bënte komente pasi duhet të jenë mjekët që po kujdesen për ta, ata të cilët duhet të shprehen.
“Unë i vizitova të gjithë që ishin atje, së bashku me zotin Bardhi, nuk dua të bëj asnjë koment për anën shëndetësore sepse janë specialistët e këtushëm që i bëjnë, është drejtori i spitalit me të cilin ne biseduam, dhe të cilët unë i respektoj për punën e tyre, për aftësitë e tyre duke qenë i bindur që do bëjnë maksimumin e tyre për shërimin sa më shpejtë të të dëmtuarve, kushdo janë ata.
Ka në gjendje shëndetësore jo të mirë, por më mirë t’i bëjnë këta që i mjekojnë, mjekët kurues, sepse ka një etikë mjekësore në këto raste”, u shpreh Shehu.
