Kryeministri Edi Rama ka hapur një ekspozitë me piktura murale dhe skulptura në qeramikë në qytetin e Rostockut në Gjermani, fundjavën që shkoi.
Me këtë rast, ai ka dhënë një intervistë për televizionin gjerman ARD, ku nuk shfaqet shumë modest, duke thënë se është kryeministri më i mirë i të gjitha kohërave.
“Buxheti që mu dha ishte asgjë. Ishte asgjë. Diçka. Shumë pak. Por duhej bërë ndryshimi. Filloi rritja e mbledhjes së taksave dhe ndryshimi i niveleve. Tani jam kryeministri më i mirë i të gjitha kohërave në Shqipëri”, tha Rama, ndërsa i tregon gazetarit gjerman dhe fotot e zyrës së tij të shndërruar në një vend pune për pikturat.
Ekspozita është hapur më 17 nëntor dhe do të qëndrojë e hapur deri më 6 janar, ndërkohë që bileta është 4 euro. Gjatë transportit disa prej veprave të Ramës u dëmtuan, po e rëndësishme është që pjesa më e madhe e tyre shpëtoi.
