I ftuar në emisionin më të ri në News24, ‘A’ me Adi Krastën, analisti Fatos Lubonja është pyetur për protestën e banorëve të Unazës së Re si dhe qëndrimin që duhet mbajtur ndaj qeverisë apo edhe opozitës për çështje të caktuara.
Lubonja u shpreh se media duhet të ketë llogoren e vet dhe duhet të përçojë informacionin me objektivit dhe jo sipas bindjeve.
Më tej, duke iu referuar debateve të fundit për Ministrin e Brendshëm të dekretuar Sandër Lleshi dhe sjelljen e eshtrave të Mid’hat Frashërit në atdhe, i pyetur nga gazetari Adi Krasta se kush e ngacmon më shumë nga të dy, Lubonja zgjodhi Mid’hatin.
Bashkë me të, ai risolli deklaratën e zv.ministrit të Mbrojtjes Petro Koçi të bërë më 17 nëntor, një deklaratë që e quajti të rëndë.adi-krasta2-770×386
“Më ngacmon më shumë debati i Mid’hatit, si njeri i kulturës dhe jam botues nga të parët e Mid’hatit dhe është një figurë që për fat të keq nuk njihet edhe pse debatohet.
Tjetër gjë që më ngacmon… e di çfarë më ngeli në mendje… pashë atje në 17 nëntor Petro Koçin që nuk bën pjesë as tek komunistët e vjetër që duke folur për çështjet e çlirimit përmendi termin kolaboracionist. Tha që familjet e kolaboracionistëve duhet t’u kërkojnë ndjesë qytetarëve dhe popullit të Tiranës. E di sa e rëndë është kjo?! Pas 20 e ca vitesh që dolëm nga sistemi komunist vazhdon me familjet… E para është kjo. E dyta që të vjen në mendje, po mirë more zotëri, si ka mundësi që këto familje që nga 1945 kanë jetuar në internime të kërkojnë falje, kujt t’i kërkojnë falje, atyre duhet t’u kërkohet falje. Dhe e treta si nuk iu vjen ndër mend njëherë të thonë ky Enver Hoxha ishte kriminel. Ky nuk mund të akuzohet si bashkëpunëtor? Bashkëpunoi me jugosllavët, me Stalinin e la vendin në atë gjendje. Këtu duhet baraspeshë por edhe histori. Kjo më bëri shumë përshtypje se ishte tregues se sa mbrapa kemi ngelur”, deklaroi Lubonja.
Pjesë nga intervista:
Ti ku e ke ndjerë veten pro apo kundër?
Për mua ka qenë gjithmonë problem ndarja pro apo kundër qeverisë. Kjo është luftë llogoresh dhe mendoj se mediat duhet të kenë llogoren e tyre. Ata që punojnë për parti të caktuara janë të dyshimtë. Unë e ndaj veten tek ata që janë jashtë këtyre llogoreve. Unë gjykoj çdo ngjarje dhe veprim sipas situatës dhe bindjeve qe kam krijuar unë për këtë qeveri dhe këtë opozitë.
Pra është e mjaftueshme Fatos një revoltë e 300 familjeve për ta zbutur edhe analizën parimore.
Këto ngjarje mund ta shikosh në shumë aspekte dhe kam frike se ne mund të biem në një grackë a duhet ndërtuar apo duhen shpenzuar 40 milionë euro. Debati po mbulon një vjedhje të madhe. Këtu nuk po hetohet të bëhet apo mos të bëhet shqiponja. A pyeti njeri banorët e Tiranës si duhet të shpenzohen 40 milionë euro? Ky është problemi më i madh që kemi ne. Unë sapo jam kthyer nga Italia. Kur hyjmë në Firence ka një trafik me të ngjeshur, sesa kur hyjmë nga shqiponja te Pallati me Shigjeta. Desha të them që e gjitha kjo është një strategji vjedhjeje me ata oligarkët që janë në simbiozë. Ideja a është Rama më i fortë se Oligarkët? Unë mendoj që është sistemi.
Kjo ngjarje si e ka fundin?
Dëshira është që të ndalohet kjo. Nga ana tjetër që shpeshherë historia tregon që njerëz të babëzitur e çojnë aventurën deri në fund. Babëzia e Ramës mund të shkojë deri në fund të shkatërrojë jetë njerëzish.
