Automjeti që dyshohet se shërbeu për të realizuar atentatin mafioz të një jave me parë në Durrës, është hedhur në mes të rrugëve nga policia e Durrësit.
Fax News raporton se bëhet fjalë për mjetin që autorët shkrumbuan fill pas vrasjes, ku viktima mbetën Edison Harizaj dhe mikut të tij Genci Caci, e cila u gjet pas ngjarjes e djegur pranë varrezave të Shën Vlashit, që tashmë gjendet e braktisur në trotuar pranë godinës së Policisë së Durrësit. Mësohet se pasi ekspertët e policisë kanë kryer ekspertizën e nevojshme, e braktisën atë në një ambjent publik pa marr parasysh se në radhë të parë bllokimin e trotuarit dhe së dyti mjeti i shkrumbuar ndodhet në një lagje ku ka dëndësi të lartë popullsie dhe krijon ndotje të zonës.
Policia e Durrësit duket sikur nuk po tregohet serioze në lidhje me hetimet që po “zhvillon” për atentatin e ndodhur mbrëmjen e së martës në Unazën e Plazhit dhe ky fakt konstatohet nga braktisja e makinës e cila duhet të ishte transportuar në një vend të posacëm dhe jo në mes të rrugës (trotuarit). Ndërkohë, sa i përket hetimeve, blutë e Durrësit nuk kanë asnjë të ndaluar për atentatin ndaj dy vlonjatëve kur kanë kaluar gjashtë ditë nga ngjarja kriminale.
Propos hetimeve që kanë ngecur, policia nuk po tregohet serioze as me provat që mund të ndihmojnë në zbardhjen e kësaj ngjarje. Edison Harizaj i njohur edhe si “padrino i Vlorës” u ekzekutua me breshëri armësh në dalje të Durrësit pasi u ndoq nga autorët teksa udhëtonte nga Tirana për në Vlorë. Bashkë me 39-vjeçarin humbi jetën nga plumbat edhe shoku i tij Genci Çaci, i cili ndodhej në makinë me objektivin e atentatit. Edison Harizaj është hetuar nga policia dhe Prokuroria e Vlorës për disa ngjarje të rënda në këtë qytet përfshirë edhe zhdukjen e Albano Xhaferrit në qershor të këtij viti, por pa gjetur prova për ta arrestuar.
