Mëngjesin e sotëm janë lënë të lirë protestuesit tek zona e Astirit që u shoqëruan mbrëmjen e djeshme në polici pak pasi protestuan në rrugë duke djegur goma dhe flamurin e Rilindjes.
Mësohet se tre prej protestuesve do të ndiqen në gjëndje të lirë.
Deputetet e PD-se Gent Strazimiri dhe Klevis Balliu, shkuan mbrëmë në komisariatin nr 6, për të kërkuar lirimin e tyre.
“Protestuan të irrituar për faktin se janë fyer në mënyrën më të turpshme dhe rrugaçërore nga ai që do duhej të ishte i pari kryeqytetas dhe jo i pari rrugaç, duke i konsideruar shpellarë. Protesta do të vazhdojë, por sigurisht do vazhdojë edhe presioni nga ana e qeverisë. Ne do të jemi këtu deri sa të drejtat e tyre të respektohen dhe të trajtohen si kryeqytetas pavarësisht nëse kanë lindur në Tiranë apo jo.”, tha Gent Strazimiri para komisariatit të policisë në Kombinat.
Banorët në Astirit po protestojnë në lidhje me dëmshpërblimet për banesat dhe bizneset që preken nga projekti i Unazës së re.
