Nga Boldnews.al
Prej dy dekadash, ata e nisën së bashku sportin e marrjes peng të Shqipërisë dhe këtë gjë po e vazhdojnë edhe sot të dy së bashku. Janë Ilir Meta dhe Edi Rama, të cilët po përdorin politikisht në këtë moment një dekretim të një ministri të Brendshëm të vendit.
Të mbetur pa Gjykatë Kushtetuese, kjo për faj të Edi Ramës, por jo vetëm, institucionet e vendit kanë mbetur pa një arbitër dhe në mëshirën e fatit të dy lojtarëve të vjetër Rama-Meta. Edi Rama nxori nga sënduku i tij i mykur këshilltarin e tij për ta bërë Ministër të Brendshëm, më tepër për ti dhënë opinionit publik imazhin se po vendoste aty një ushtarak. Të njëjtën gjë ai bëri një vit më parë kur emëroi prefektë në krye të qarqeve të vendit 12 ish-ushtarak të cilët edhe pse me bujë dhe pompozitet tashmë 12 muaj më pas, nuk kanë bërë asgjë për të justifikuar bujën më të cilën u vendosën në këtë detyrë.
Me një imazh të dërrmuar brenda dhe jashtë vendit si kryeministri që më shumë ngjan me një përfaqësues të krimit sesa luftues i tij, si një adoleshent i rrjeteve sociale se sa si njeriu që ka marrë votat për të qeverisur, ai vazhdon të gjejë zgjidhje anësore për të dalë nga situata ku e ka futur vendin në një ortakëri të paprecedentë me krimin e organizuar.
Ndërsa Ilir Meta, gjysma tjetër e mollës së kalbur duke shfrytëzuar atë që ka bërë Edi Rama vetë me Gjykatën Kushtetuese, nisi një lojë duke mosdekretuar kandidaturën e Lleshit për ministër të Brendshëm. Ky veprim i Ilir Metës ishte një futje në luftën brenda Partisë Socialiste si në kohët e vjetra. Meta tentoi me këtë veprim të tërheqë rreth vetes Fatmir Xhafën dhe Erion Veliajn, si dhe militantët e ‘enverizmit’ duke lëshuar sinjale se ai është padroni i vërtet shpirtëror i tyre. Është e pashpjegueshme se përse Presidenti i Republikës nuk dha arsye të qarta se përse nuk e dekretoi Sandër Lleshin. Pse nuk i ndan me publikun qëndrimet e tij për gjykatën kushtetuese krimin e organizuar, ekonominë dhe çdo gjë tjetër që po shkon për dreq në këtë vend?
Ilir Meta i ka arsyet e tij. Ai qeverisi 4 vite me Edi Ramën dhe gjendja ku është vendi është padyshim edhe për faj të tij. Gjatë mandatit të tyre të përbashkët, Ilir Meta sakrifikoi këdo nga bashkëpunëtorët e tij për ti siguruar qetësi Edi Ramës. Ndërkohë, që vetëm dy vite para se të vendosnin të ‘rimartoheshin’, Ilir Meta shprehej kështu për Edi Ramën. “Kjo fundërrinë e pashoqe e shoqërisë shqiptare… Ky njeri që akuzoi babain e tij si babain e djalit të tij… Ky njeri i panderë pa familje dhe pa asnjë normë morale”.
Pas këtyre fjalëve, ata qeverisën të lumtur bashkë për katër vite derisa Rama ja futi Metës.
Sot, ata janë në betejën e tyre të radhës. Por kjo nuk është beteja e shqiptarëve. Beteja e shqiptarëve është ti fshinin nga jeta politike të dy këto personazhe dhe të tjerë të ngjashëm me këta ku e kanë kthyer vendin në sheshbetejën e krimit të organizuar. Ata të dy bashkohen bashkë vetëm për t’ua futur shqiptarëve dhe në fund’ përveç shqiptarëve, ja fusin dhe njëri-tjetrit.
Më poshtë, dy video që tregojnë më së miri qëndrimet publike që ata kanë mbi njëri tjetrin.
