“As statuset e rëndomta të shkruara në dëshpërim, as kërcënimet me padi, nuk e shpëtojnë dot z. Dako nga destinacioni i radhës: burgu”. Deklarata vjen nga deputetja demokrate Albana Vokshi, e cila duket se e sheh të ardhmen kryebashkiakut të Durrësit pas hekurave.
Në një postim në Facebook, Vokshi shkruan: “Më vjen mirë që Zoti Dako ka filluar të mbledhë barcaleta. Thuhet, se ditët në burg janë monotone, e të fortët i shtyjnë me barcaleta dhe me anekdota. Është përgatitje e mirë për të ardhmen që e pret. Banditët politikë dhe banditët e rrugës do të përfundojnë në burg që të çlirohet Durrësi dhe gjithë Shqipëria nga krimi, betoni dhe xhuxhëria njerëzore dhe mendore. Dosja nr. 339 ‘bërtet’ shumë fort. As statuset e rëndomta të shkruara në dëshpërim, as kërcënimet me padi, nuk e shpëtojnë dot z. Dako nga destinacioni i radhës: burgu”.
Më herët gjatë ditës së sotme, në një deklaratë nga selia blu, Vokshi hodhi akuza ndaj Dakos. Deputetja Albana Vokshi tha mes të tjerash se, “Vangjush Dako duhet të arrestohet pa vonesë”. Kryebashkiaku i Durrësit u kundërpërgjigj, duke e paralajmëruar se do ta padisë. Pas kësaj, Vokshi ka reaguar sërish.
