Eurodeputetja qipriote, Eleni Theocharous u shpall “non grata”, ose “e padëshiruar” sot me një kërkesë të ministrisë së jashtme shqiptare. Ajo ishte e pranishme në ceremoninë e varrimit të Kostandinos Kacifas në Bularat ku u hodhën parulla antishqiptare.
Eurodeputetja reagoi pas deklaratës së Ramës që e quajti 35-vjeçarin një “ekstremist të marrë”, duke e konsideruar kryeministrin shqiptar të korruptuar.
“Le te jetë kryeministri i korrupsionit që e konsideron ‘ekstremist të marrë’ e jo Athina. Kam detyrim moral te hap çështjen e shkeljes së te drejtave dhe vrasjes së Kaçifas në PE” – u shpreh Theocharous.
Pas incidentit te 10 ditëve më parë ajo do te deklaronte: “Shqipëria nuk do të hyjë me gjak në Bashkimin Europian”.
Ndërsa në ditën e varrimit te ekstremistit Kacifas ajo u shpreh: “Rasti tregon se sa respektohet minoriteti në Shqipëri. Të cilësojnë terrorist, të çmendur. U përpoqën të të vrisnin edhe me harresën e tyre. Ti re për bashkimin tonë. Rrugë të mbarë në parajsë. Krimi jot i vetëm është që ti e doje shumë Greqinë. Je i pavdekshëm”.
Po kush është Eleni Theocharous?
Kjo nuk është hera e parë që ajo mban qëndrime antishqiptare. Sjellja e saj ka rënë për herë të parë në sy në një aktivitet në mbështetje te protestës për prishjen e ndërtimeve pa leje në Himare dy vite më parë.
“Gjendem mes greqizmit të Vorioepirit, i cili prek këto toka të shenjta të një vendi grek të lashtë, që ka ngelur jashtë kufijve të shtetit grek” – tha ajo në atë kohë.
