Artan Mërgjyshi nuk ka qenë prezent sot në seancën stërvitore të Laçit, në vigjilje të transfertës së vështirë me Luftëtarin. Burime pranë futbollistëve bëjnë të ditur se 50-vjeçari është larguar pas përfundimit të analizës taktike të duelit që u mbyll me humbje ndaj Kukësit.
Mesa duket dy humbjet radhazi kanë prishur humorin tek kurbinasit që pas ecurisë fantastike në 8 javët e para kishin filluar të ëndërronin edhe për titullin. Por dy disfatat e njëpasnjëshme kanë ulur me këmbë në tokë bardhezinjtë edhe pse skuadra mbetet ende në garë për zonën europiane.
Vetë tekniku kryeqytetas ka konfirmuar për Supersport se e ka mbyllur bashkëpunimin e tij me Laçin, por klubi kurbinas vijon të jetë i rezervuar për të sqaruar këtë çështje. Paraprakisht mësohet se seancën e nesërme stërvitore do ta drejtojë ndihmësi i Mërgjyshit, Migen Memelli, i cili mund të drejtojë skuadrën në fundjavë.
Largimi i trajnerit Artan Mërgjyshi është si një “rrufe në qiell të hapur”, pasi ecuria e Laçit dhe loja e treguar ishte shumë e mirë. Në 10 javët e para finalistët e Kupës së edicionit të kaluar regjistruan 4 fitore, 4 barazime dhe dy humbje, duke patur ekuilibër të plotë përsa i përket golavarazhit, me 8 realizime dhe po kaq gola të pësuar.
Në fundjavë Laçi udhëton drejt Gjirokastrës për t’u përballur me Luftëtarin që po kalon një moment të mirë, për më tepër që do të gjejë përballë ish trajnerin Gentjan Mezani që i udhëhoqi sezonin e kaluar drejt zonës europiane.
