Në ndeshjen e vlefshme për “Champions League”, mbrojtësi i ekipit serb Crvena Zvezda, Marko Gobeljic, luajti përballë futbollistit shqiptar Xherdan Shaqirit, i cili aktualisht aktivizohet tek skuadra e Liverpool-it.
Gjatë ndeshjes ata patën edhe disa ngacmime verbale, ku lojtari i Zvezdës thekson se Shaqiri e ka sharë në gjuhën serbe.
“Jam munduar të luaj futboll dhe sa më pak të komunikoj me të. Është futbollist cilësor, shumë i shpejtë dhe i vështirë për ta ruajtur. Unë në çdo duel hyj burrërisht në top dhe kështu ishte edhe me Shaqirin. Pas një starti të tillë, ai më fyeu në gjuhën serbe, madje më kërcënoi duke ma drejtuar gishtin. Ia kam kthyer në të njëjtën mënyrë, sepse askujt nuk i mbetem borxh. Pas atij momenti nuk ka guxuar të vijë nga ana ime dhe vazhdimisht largohej në drejtim të mesit të fushës”, ka thënë Gobeljic.
Ai gjithashtu është shprehur se në ndeshjen e kthimit futbollistit shqiptar nuk do t’i pëlqejë aspak atmosfera.
“Nuk e kam humbur asnjë duel me të. Dyshoj shumë se ai do të jetë në Beograd pas dy javësh. Gjithçka varet nga trajneri i tij Jurgen Klopp. Personalisht do të doja që Shaqiri të vijë në Beograd dhe të shijojë atmosferën në ‘Marakana’, por nuk besoj se do të jetë këtu”, ka thënë Gobeljiç.
