Kryedemokrati Lulzim Basha thotë se qeveria është e dalë nga krimi dhe jo nga vota e qytetarëve dhe se këtë gjë e tregojnë zhvillimet e ditëve të fundit. Duke folur ditën e sotme në një bashkëbisedim me banorët e Manzës në Durrës, ai tha se Fatmir Xhafaj, nuk u dorëhoq nga ministër i Brendshëm, por u shkarkua.
Ai tha se dorëheqja është propagandë e rilindjes dhe se janë thënë lloj lloj barcaletash për të fshehur të vërtetën.
Por sipas tij, Xhafaj u largua për ti bërë bisht hetimit të dosjes së vëllait të tij Agron Xhafaj. Kryedemokrati deklaroi se Xhafaj kishte frikë se si të shpëtonte vëllanë e dënuar për drogë.
“Një ministër që përfshihet në manipulimin e një dosjeje hetimore duhet të jetë sot para drejtësisë. Fatmir Xhafaj u largua pikërisht për t’i bërë bisht akuzave ndaj vëllait të tij Agron Xhafaj, dosje e cila u bë e ditur vetëm falë qëndresës së iopozitës. Xhafaj u largua nga frika e përballjes me përgjegjësinë e hetimit ndaj vartësve të tij, drejtorit të Përgjithshëm Ardi Veliu dhe njerëzit e tjerë që janë të përfshirë në manipulimin e dosjes”, u shpreh Basha.
