Me qindra persona i dhanë të premten lamtumirën e fundit Kledis Gixharit, 18-vjeçarit shqiptar i cili humbi tragjikisht jetën në një aksident me motor në Itali, mbrëmjen e së dielës.
Prindër, miq dhe shokë të shkollës vendosën që t’i qëndronin sa më pranë prindërve të 18-vjeçarit, Shkëlqim dhe Donika Gixhari, si dhe vëllait të tij të vogël 10-vjeçar.
Çdo hap ishte i dhimbshëm, teksa në heshtje kortezhi përshkoi të gjithë qendrën e Lamporecchio, në Pistoia, ku Kledisi jetonte. “Një tragjedi që ka tronditur një komunitet të tërë dhe që është e vështirë t’i japësh një shpjegim racional”, shkruajnë mediat italiane për humbjen e të riut shqiptar.
Mbrëmjen e së dielës, Kledisi kishte qenë në një festë në lokalet në sheshin Falcone. Dikur, sëbashku me një shok të tij, doli për të blerë cigare. Dyshja hipi në një motor scooter që nuk ishte i tyre, por që ndodhej i parkuar aty prej disa ditësh.
Por një moment që mbërritën në rrugën Di Vittorio, gjithnjë në Lamporecchio, ata humbën kontrollin e mjetit dhe u përplasën me kangjellat e një banese. Pavarësisht ndihmës së shpejtë, për Kledisin nuk mund të bëhej asgjë, ndërsa shoku i tij 20-vjeçar mbeti i plagosur.
“Dua t’ju falenderoj të gjithëve që na dhatë forcë për të përballuar këtë humbje kaq të dhimbshme. Të gjithë miqve të tij dua t’i them se Kledis nuk mund të ecë më në të njëjtën rrugë me ne. Zoti në fakt e zgjodhi që ta bënte engjëll”, tha babai i 18-vjeçarit, i cituar nga mediat italiane.
