Përballja e 29 tetorit mes Skënderbeut dhe Partizanit do të jetë e 119-ta në historinë e dy klubeve. Shifrat e 118 ndeshjeve të mëparshme tregojnë një epërsi të dukshme të “demave të kuq”.
Partizani ka fituar në 65 ndeshje, ndërsa korçarët vetëm në 24 raste dhe fitoren e fundit e kanë arritur më 17 gusht 2018, në Korçë, ku i mposhtën 1-0 me golin e Muzakës me penallti në minutën e 94-t.
29 ndeshje janë mbyllur në barazim, ku i fundit u arrit më 27 nëntor 2017 në shifrat 0-0 në kryeqytet. Edhe golavarazhi i këtyre përballjeve ka një diferencë të lartë në favor të Partizanit me 202 gola të shënuar dhe 79 të pësuar.
-Në 4 sfidat e luajtura në sezonin e fundit, Partizani nuk i shënoi asnjë gol Skënderbeut. Në fazën e parë janë mundur 2-0 në Korçë, më pas barazuan 0-0 në kryeqytet, si dhe u mundën 1-0 në duelin e fazës së tretë me një autogol të Gojkoviç. Dueli i fazës së katërt i luajtur në kryeqytet u fitua nga korçarët në shifrat 1-0. Shterpësia e “demave” ka nisur edhe në këtë edicion, pasi nuk shënuan dot në premierë në portën e Skënderbeut.
– Plot një dekadë është dashur që Skënderbeu, pasi kishte kaluar 20 ndeshje radhazi (në vitet 1947-1957), të mbërrinte te fitorja e parë ndaj Partizanit, skuadër që në vitet e para ka qenë tepër “e frikshme” përballë çdo kundërshtari.
– Ndër fitoret më të spikatura janë ato me përfundime të thella në favor të të kuqve. Konkretisht: 7-0 në 1948, 6-1 në 1949, një vit më pas 8-1, rezultat ky i arritur në Korçë. Më pas ka fituar Partizani po 5-0 në Korçë në 1952, 6-1 në 1953, kurse në 1954 dy herë nga 5-0, si në Korçë, ashtu dhe në Tiranë, ku ka edhe një tjetër 5-0 më 24.05.1956.
– Dy fitoret e para të Skënderbeut janë të ngushta, secila nga 1-0, të arritura në Korçë dhe i përkasin njëra më 26.05.1957 dhe tjetra diçka më pak se një vit më pas më 06.04.1958.
