Nga Boldnews.al
Dy përgjime të bëra publike, të lidhura më kryebashkiakun e Durrësit Vangjush Dako dhe bandën e Shijakut, pritej të shkaktonin një tërrmet të madh brenda shumicës së majtë në pushtet.
Në fakt, si një artist i vërtetë cirku (klloun), Vangjush Dako ia doli, nëpërmjet relativizimit të gjithçkaje, ta marrë me shumë sportivitet situatën e krijuar. Ndërkohë që, në çdo vend demokratik, në një rast të ngjashëm, ai do të ishte pas hekurave dhe, pse jo, do të kishte rënë edhe qeveria.
Ai e sfidoi hapur shoqërinë, median, prokurorinë dhe opozitën, duke thënë dhe kundërthënë gjëra të ndryshme dhe të kundërta brenda pak minutash. Në fillim Dako tha se ishte përgjegjës politik për një qytet prej 300 mijë banorësh dhe nuk e dinte se kush ishte i dënuar dhe kush jo. Më pas u detyrua të pohonte se kishte qënë bujtës në shtëpinë e Avdulajve. “Po, kam qenë te shtëpia e Avdylajt”, tha Dako në “Opinion”.
Me stilin e vet të humorit, ai tha se këto janë budallallëqe dhe opinioni publik e paneli mediatik nuk duhet të merret me kësi gjërash. Në fakt, në përgjime del qartë Vangjush Dako që kërkon të komunikoj me një eksponent të krimit të organizuar dhe të cilin kërkon ta takojë për ta falënderuar.
Por, me stilin e Ramës “hidhu në kundërsulm”, Gjushi, një xhuxh i lezetshëm magjik, nuk kurseu me akuza as të gjallët, as të vdekurit e kësaj shoqërie. Ai, njësoj si shefi i tij, Edi Rama, tha për çdo gjë që akuzohej se këto gjëra i ka bërë opozita dhe se ai vetë ishte “akullore, qelibar”.
Vangjush Dako e personifikoi shëmbëlltyrën e zhgarravitur të Rilindjes, duke qënë shumë i qartë në idetë e tij dhe të shumicës së majtë në pushtet. Ai tha se mund të takonte këdo, mjafton që ta votonin atë dhe qeverinë e tij. “Unë jam Kryetari i Bashkisë së Durrësit. Pushteti im buron nga vota dhe unë komunikoj me çdo qytetar. Ku ka familje me këtë mbiemër, unë shkoj e takoj, unë shkoj në çdo qendër elektorale. Unë shkoj dhe marr kontakte të drejtpërdrejta me çdo anëtar të familjeve dhe u kërkoj votën në favor të punës që unë bëj. … Nuk ka person në qytetin e Durrësit që unë nuk kam komunikuar. Mund të marrësh çdo emër në gjendjen civile dhe unë të them se kush është dhe ku banon.”
Sipas një llogjike të thjeshtë, Durrësi ka më shumë se 300 mijë votues dhe Vangjush Dako takon 200 votues në ditë për katër vite me radhë, çdo ditë, pa pushim, as për festa dhe as të dielave. Një mashtrim kaq i rëndë, i padëgjuar, fyen inteligjencën minimale të çdo shqiptari që di shumëzim dhe pjestim.
Por Vangjushi është në të drejtën e tij në vazhdimësi kur i thotë këto gjëra. Këto deklarata janë në vazhdën e motos së vitit 2013- “të krijojmë aleancën e qelbësirave dhe të marim pushtetin”. Kjo ndodhi. Por tani, qelbësirat nuk ikin më. Ata janë në krye dhe kanë bërë pis këdo, edhe ata që ishin të pastër, sigurisht jo Vangjushin.
Vangjushi, njësoj si Edi Rama, diku me akuza, diku me arrogancë dhe diku tjetër me batuta e kaloi “provën e tij të zjarrit”. Ndërsa njerëzit që e shihnin nga shtëpitë prisnin, me siguri, minutë pas minute, që në studion e tv Klan të mbërrinte prokuroria me mandatin në dorë.
Problemi i vetëm në këtë skenar është se prokurorët janë tredhur plotësisht nga Vetingu dhe politika. Ata nuk kanë më as sedër profesionale dhe asnjë pikë dinjiteti njerëzor. Ata, të mëdhenjtë e Krimeve të Rënda, janë në shërbim të Fatmir Xhafës dhe Edi Ramës, për t’u marrë më kallëzime të rreme, për të falsifikuar dosje në dëm të një gazetari.
Sidoqoftë, përveçse të korruptuar, ata janë edhe të paaftë që ta bëjnë këtë gjë. E, me siguri, një ditë të bukur, do u dalin të palarat në shesh. Prokurorja e Përkohshme e Përjetshme ka emëruar të gjithë miqtë e saj në organin e akuzës dhe ka larguar ata pak prokurorë që i kishin bërë rezistencë kapjes së institucionet nga mafia politika dhe narko shteti. Në këto kushte, del një “xhuxh magjik” në një studio televizive dhe eklipson dhe ish-basketbollistin e famshëm, Edi Rama, pavarësisht se kështu nga shtati i dyti është sa dyfishi i gjatësisë së tij.
P.S. Fjalinë e fundit e themi me hamendje që të mos na padisë njeri për shpifje.
