A është e mundur që një lojtar i Kategorisë së Parë shqiptare të ndiqet nga klube gjigante të Serisë A italiane? Ndoshta, po të jetë ndonjë talent 17-18 vjeç, i cili ka cilësi të rralla, që i pikas ndonjë vëzhgues i huaj dhe kërkon të bëjë një goditje të madhe duke mos shpenzuar asgjë.
Dihet që shpesh ka ndërhyrje, menaxherë që kërkojnë t’u publikosh ndonjë lajm, t’i bësh reklamë ndonjë lojtari që ka. Por kësaj që po lexojmë në mediat italiane nuk dimë t’i vëmë emër. Sipas “Calciomercato.com”, Lazio dhe Xhenoa kërkojnë një mbrojtës të majtë. Shumë mirë deri këtu, nuk ka asgjë të çuditshme.
Ndoshta kanë gabuar person? Jo, sepse në artikull jepen edhe detaje të sakta për mbrojtësin 27-vjeçar, i cili tani luan tek Liria në Kosovë dhe deri vjet luante tek Tomori, ndërsa më parë ka luajtur edhe Naftëtari e Turbina!
Calcimercato.com shkruan se Daci është mbrojtës i majtë, çka do i shërbente shumë Genoa-s, që kërkon një alternativë për Mimmo Criscito në krah, ndërsa Lazio po mendoka ta çojë Dacin te Salernitana fillimisht.
Nuk dihet si ka arritur ky lajm të dalë në qarkullim në një sit që konsiderohet serioz në Itali, por duket si një shaka nga ato për 1 prillin, sepse Daci i shkretë edhe në Superiore nuk ka pasur mundësi të tregojë sa vlen, imagjinoni të ketë mahnitur vëzhguesit e Lazio-s dhe Genoa-s, aq më shumë në një moshë jo fort të re, raporton telesport.
Pyetja e thjeshtë është: vëzhguesit janë krejt idiotë, apo te calciomercato.com shkruajnë gjithçka u nisin në mail, ndoshta edhe si një nder për ndonjë menaxher anonim?
Në Itali sa duket nuk i kanë informuar saktë, pasi 27-vjeçari luan si qendërmbrojtës. Sipas tyre, veçse në të majtë, ai luan edhe në krahun e djathtë.
Me gjithë respektin për futbollistin aktual të Lirisë së Prizrenit, por me karrierën që ka ai në Shqipëri, zor se dy klube të tilla mund t’i hedhin sytë nga ai. Por lajmi nuk përfundon me kaq, pasi thuhet se ka luajtur me kombëtaret e moshave të vendit tonë dhe mund të jetë pjesë e kombëtares së madhe në të ardhmen. Sipas tyre, trajneri Kristian Panuçi e ka nën vëzhgim.
Ku i dihet, ndoshta do të testohet për të zëvendësuar Agollin. Po arriti të bindë se mund të luajë me Lacion apo Xhenoan, edhe mund të ndodhë. Me siguri Daci as në ëndrrën e tij më të bukur nuk e ka parë veten të luajë në Serinë A. Sigurisht në këtë moshë, pasi në vegjëli njeriu ëndërron.
