Ditëve të ngrohta dhe me diell po u vjen fundi për këtë sezon. Sinoptikanët kanë parashikuar që gjatë fundjavës dhe në vijim temperaturat të ulen, madje do të shoqërohen me reshje shiu e më pas edhe me flokët e parë të borës.
Sipas Meteoalb, reshjet e para të borës pritet të bien në zonat Lindore të vendit në datat 22 – 23 tetor. “Në zonat Lindore shfaqet mundësia për reshje dëbore në datat 22 – 23 tetor”, sqaron Meteoalb.
Po ashtu, mesditën e së shtunës është parashikuar të ketë reshje shiu.
“Moti mbetet me kthjellime dhe vranësira të lehta e kalimtare deri të shtunën kur pritet shtim i vranësirave në territor. Vranësirat do të fuqizohen gjatë së dielës dhe së hënës kur priten shira në të gjithë vendin.
Temperaturat e ajrit vijojnë pa luhatje të ndjeshme gjatë gjithë javës; ku minimumet variojnë nga 6°C mëngjeset në zonat malore deri 14 – 16°C në zonat e ultësirës ndërsa vlerat e mesditës, do të variojnë nga 20°C në Juglindje deri në 27 – 28°C vlerat maksimale në Jugperëndim të vendit. Mesdita e së dielës sjell një rënie të theksuar të vlerave termike; kryesisht gjatë mesditës duke ulur maksimumet në vlerat 15 – 18°C në zonat malore dhe deri 23°C në zonat e ultësirës (vlera tipike të stinës së vjeshtës)”, thekson Meteoalb.
