Analisti Fatos Lubonja i është përgjigjur sot në rubrikën “Opinion” deklaratave të bëra mbrëmjen e kaluar nga kryeministri Edi Rama në emisionin “Dritare me Rudinën”.
Ndërsa në emision u soll një video me momentet e reagimit të kryeministrit ndaj gazetarëve, kur në ekran u shfaq Lubonja, Rama pasi e quajti shpifës tha se do e kursente sepse ka qenë në burg.
Pikërisht për këto deklarata Lubonja ka folur sot. Ai tha se para ligjit të gjithë janë të barabartë dhe tha se Rama flet në emër të drejtësisë, çka për të është shenjë e një degradimi.
“Nuk jam dakord me këtë që të kursehem që kam qenë në burg, para ligjit janë të gjithë të barabartë. Mendoj që thelbi i këtij debati është raporti i kryeministri po në përgjithësi i pushtetit me të vërtetën, me gjërat që thuhen, janë perceptim apo dhe fakte. Përgjithësisht, ça është kategoria e politikanëve tanë nuk e njohin dialogun por njohin akuzën. Je me mua ose je kundër meje.
Ti duhet të faktosh pse është shpifje. Më e rënda është që ti flet në emër të drejtësisë. Kjo është shenjë e një degradimi në fund fare. Për të mos thënë se akuzat janë shumë të rënda dhe nëse je i pastër duhet të jesh i qetë por nuk je akuzon për shpifje dhe ulërin. E dyta nëse ke akuza duhet t’i verifikosh jo të bësh mbulesën e parë. Sa prova duhet të kemi ne që të provojmë se ky kryeministri dhe gënjeshtra janë dy anë të së njëjtës medalje. Kjo është më shumë kërcënim. Vijmë tek situata unë kam drejtësinë, kam policinë dhe ose ti mbyll gojën ose të akuzoj”, deklaroi Lubonja.
Për sa i përket paketës anti-shpifje dhe arsyet e lancimit të saj nga kryeministri Edi Rama, Lubonja shpjegoi: “Mekanizmi psikologjik i kryeministrit është i njëjti mekanizëm që në situata të tjera, regjime të tjera ka çuar deri në krime të rënda, shfarosje kundërshtarësh.
Është në një terren të panjohur dhe kryeministri dhe ne. Me një shpifje të vjen për të qeshur kur ke punët e mira përpara. Por kur ke problemet që kemi ne… Ky është një vend katastrofë që drejtësinë e bën më i forti”, tha Lubonja.
Lidhur me deklaratën e Ramës se gazetarët i qepen një personi në mënyrën më të keqe të mundshme, analisti tha se shqetësim është mbrojtja me pushtet.
“Ne nuk na shqetëson personi por mbrojtja me pushtet. Ajo që më shqetëson më shumë është përshkallëzimi. Njëherë është korrupsioni, pastaj të akuzojnë me fjalë pastaj vjen kërcënimi. Shqetësimi tjetër është që Edi Rama është i blinduar nga ndjenja e fajit. Nuk e njeh ai. Ka plot njerëz të tillë. Problem janë të tjerët që e ndjekin nga mbrapa”, u shpreh Lubonja.
Analisti tha se Ramës i ka hyrë uji nën rrogoz dhe mënyra e sjelljes së tij është provë fajësie.
“Unë jam një gazetar që supozohet ose jam i pavarur dhe kam historinë time që nuk kam marrë ndonjëherë pushtet nga partitë. Unë bëj deduksionet e mia. Ai ka konflikt interesi. Për mua është problem publik për të është problem personal. Publiku dëgjon. Fakti që zotëria kalon nga fjala që këto janë shpifje gënjeshtra tek kërcënimi që do ju dënoj për shpifje tregon që i ka hyrë shumë ujë nën rrogoz. Kjo është provë indirekte e fajësisë. Dhe këtu vijmë prapë tek drejtësia. Nuk mundesh ti të thuash këtë e vendos drejtësia dhe në anën tjetër vendos kryeprokuroren me dhunë, njeriun tënd”, deklaroi Lubonja.
