Humbja që Shqipëria pësoi nga Izrael në Beer sheva mund të ketë pasoja edhe më të mëdha. Shanset për kualifikim nuk ekzistojnë, por tani kuqezinjtë rrezikojnë të zbresin në Ligën D, aty ku aderon Kosova në rast se nuk fitojnë as ndaj Skocisë. Aktualisht kombëtarja pozicionohet në vendin e fundit të grupit 1 në Ligën C. Të besuarit e Christian Panucci-t, në rast se nuk arrijnë të mposhtin Skocinë në ndeshjen e ardhshme do të bien automatikisht një Ligë më posht, ku do të përballen me skuadra modeste si Malta, Andora, Letonia apo san Marino.
UEFA ka bërë një përshkrim të shkurtër për gjendjen e grupeve dhe shkurtimisht shkruan se Shqipëria ka nevojë për të mposhtur Skocinë për të mos zbritur në Ligën D. “Shqipëria do të bjerë nga Liga nëse nuk arrin të fitojë ndaj Skocisë”, shkruan UEFA. Panucci e nisi këtë kompeticion me ambicie të mëdha ku kalimi i grupit nuk diskutohej, por rezultatet e fundit bënë që ai të dorëzohet dhe të pranojë se shanset për t’u renditur të parët nuk ekzistojnë. Ndeshjen e radhës kombëtarja e luan në Shqipëri kundër Skocisë, ku fitorja do të jetë objektivi i vetëm.
