Prokuroria për Krime të Rënda ka marrë sot në pyetje Fredi Alizotin, i cili sipas Prokurorisë dyshohet se ka imituar zërin e Agron Xhafajt në audio përgjimin e publikuar disa muaj më parë nga PD. Ndërkohë Alizoti u shfaq në një video përgjimi të publikuar nga PD dy ditë më parë, dhe përfshin në këtë çështje drejtorin e Policisë së Shtetit, Ardi Veliu dhe deputetin e PS, Taulant Balla.
“Ky shtetas ka deklaruar që shtetasin Albert Veliu (Babalja) e njihte prej 20 vitesh. Rreth muajve tetor – nëntor të vitit 2017, ai i kishte thënë që donte t’i bënte një regjistrim shtetasit Agron Xhafaj, vëllai i Ministrit të Brendshëm, por nuk i gjente dot anën, pasi ai nuk e afronte. I kishte ofruar që të bënin një regjistrim dhe shtetasi Fredi të hiqej sikur ishte shtetasi Agron Xhafaj.
Për këtë shërbim “Babalja”, i kishte thënë që do të merrnin 200.000 euro nga deputeti me mbiemrin Salianji. Këtë bisedë e kishin regjistruar në Vlorë te një lokal përballë atij që kishte shtetasi Agron Xhafaj. Sipas deklaruesit, “Babalja” kishte premtuar që do t’i jepte 100.000 euro dhe zëri i shfaqur në regjistrimin e bërë publik nga televizionet në bisedë me Babalen, ishte zëri i tij. Babalja deri në këto momente nuk i ka dhënë asnjë lek”, thuhet në njoftimin e Prokurorisë.
Organi i akuzës thotë se po hetohet për kallëzim të rremë deputeti demokrat Ervin Salianji.
Ndërkohë, ish-ministri i Drejtësisë, Ylli Manjani, thotë se kjo i duket absurde.
“Epo të akuzohesh për Kallëzim të Rremë pa bërë fare Kallëzim, vetëm prokuroria politike e Ed Ramës mund ta bëjë! Turp e faqja e zezë!” shprehet ai.
