Policia e shtetit ende po punon për zbardhjen e plotë të atentatit të mbrëmjes së djeshme në zonën e ish-bllokut, ku mbeti i vrarë shtetasi Fabiol Gaxha , ndërsa u plagosën Ervis Martinaj dhe Eljon Hato.
Së fundi raportohet së në vijim të hetimeve grupi hetimor ka tentuar disa herë që të marrë dëshminë e të plagosurit, Ervis Martinaj, që kishte si badigard, viktimën, Fabiol Gaxha, por ka qenë e pamundur.
Ky vendim i Martinajt pritet ta bëjë akoma më të vështirë punën e policisë pasi nuk kanë mundur të kapin asnjërin nga atentatorët edhe pse janë shpallur në kërkim Ervin Mata, 31 vjeç, (i dashuri i këngëtares, Elvana Gjata), Fabjol Alushi, 42 vjeç dhe Merviol Bilo, 41 vjeç i cili është dhe efektivi i Forcave Komando.
Gjithashtu mësohet se paraditen e sotme Ervis Martinaj u transferua në një spital privat për trajtim të mëtejshëm mjekësor, ndërsa i plagosuri tjetër Eljon Hato ndodhet ende në Spitalin Ushtarak.
