Në Qendrën për Hapje dhe Dialog (COD) pranë ambienteve të kryeministrisë, u nënshkrua “Memorandumi i Ri i Mirëkuptimit me Fondacionin Shqiptaro-Amerikan për Zhvillim (#AADF) për Zgjatjen e Programit “LEAD Albania” për një periudhë të dytë 5-vjeçare (2019 – 2024).
Nënshkrimi i marrëveshjes së re e cila do të ketë një financim prej 3.2 mln dollarësh, është bërë nga zv.kryeministrja Senida Mesi, çka do të bëjë që investimi total i programit të shkojë në 5.7 mln dollarë.
Pas nënshkrimit të marrëveshjes mes palëve u organizua edhe ceremonia e diplomimit të pjesëmarrësve aktualë (viti 2018) dhe prezantimit të atyre të rinj në Programin “LEAD Albania 2019”.
Ky program ambicioz, jo vetëm mbartës i një sistemi vlerash që rrit standardet brenda administratës sonë, por gjithashtu kontribuon në një mënyrë apo një tjetër në përmirësimin e shërbimeve publike ndaj çdo qytetari të vendit.
Janë 48 individë që janë bërë deri më sot pjesë e Programit “LEAD Albania” dhe nga 70% e pjesëmarrësve në Program, të cilët vijnë nga sektori jopublik, 45% e tyre vijojnë të zhvillojnë karrierën e tyre dhe të jenë të punësuar në sektorin publik. Disa nga personalitetet e këtij programi janë profesionistë të nderuar në fushën e tyre, për të përmenduar disa si: Admir Malaj, Bledi Dervishaj, Sabina Juka, Krislen Keri, Qamil Dika, Ledio Braho, Dritan Palnikaj, Enton Duro, Eduart Gjokutaj, Elena Pici, etj.
Të pranishëm në këtë aktivitet ishin zëvendëskryeministrja e Republikës së Shqipërisë, Senida Mesi, Kryetari i Bordit të Fondacionit Shqiptaro-Amerikan për Zhvillim (AADF), Michael Granoff, anëtarë të tjerë të Bordit, pjesëmarrës ndër vite të këtij programi etj.
