Në orët e para të mëngjesit të së premtes, persona ende të paidentifikuar i kanë vënë flakën me benzinë derës së banesës së oficeres së Policisë Gjyqësore në Gramsh, Laura Boçi.
Ka qenë vetë çifti i bashkëshortëve, ata të cilët kanë lajmëruar Policinë si dhe zjarrfikësen. Ngjarja ka ndodhur gjatë natës para derës së jashtme të banesës së shtetasit M.F. (bashkëshorti i oficeres).
Ndërhyrja në kohë e zjarrfikëses bëri që nga zjarri të mos shkaktoheshin dëme materiale. Grupi hetimor po punon për zbardhjen e plotë të rrethanave dhe të shkakut të zjarrit. Ndërkohë, pas ngjarjes çifti i trembur dhe i tronditur nga ajo që u ka ndodhur është marrë në pyetje nga Policia.
Edhe pse dyshimet e para janë për shkak të detyrës, vetë oficerja ka deklaruar se deri më tani ajo nuk ka asnjë konflikt, si në punën që ajo bën, por edhe në jetën personale.
Edhe pse Policia e ka disi të vështirë për të identifikuar autorët pas deklaratës së oficeres, mësohet se pas ngjarjes janë shoqëruar disa persona të dyshimtë, të cilët janë marrë në pyetje me qëllim kapjen e autorëve.
