Kreu i PD-së, Lulzim Basha, ka komentuar nga Vlora çështjen e Emiljano Shullazit.
Sipas Bashës, mbetja pa prokuror i çështjes gjyqësore në ngarkim të tij është shembulli më i mirë sesi ka kapitulluar reforma në drejtësi.
Basha: E patë se çfarë ndodhi dhe në gjyqin e Emiljano Shullazit, bllokuar prej tre muajsh nga qershori. Dje e gjithë trupa e prokurorëve ka refuzuar, duke u larguar nga mbledhja, farsën e organizuar nga kamikazja dhe ushtarja e Edi Ramës dhe Fatmir Xhafaj në prokurorinë e Krimeve të Rënda, Donika Prela, për gjoja një short të ri për të përcaktuar prokurorë të rinj të çështjes.
Sot gjyqi ndaj kryebanditit Shullazi është pa prokuror, nuk ka prokurorë për të gjykuar banditët.Kjo është vepra e Edi Ramës me reformën në drejtësi. Nga një instrument të drejtësisë është kthyer në një instrument të politikanëve të lidhur me krimin sepse Emiljano Shullazi, Saimir Tahiri dhe Edi Rama janë një dhe vetëm një.
Ky është shërbimi i Edi Ramës ndaj Emiljano Shullazit dhe dhjetra shullazëve të tjerë brenda në qeli, që po lirohen nga qelitë apo që mbeten në liri. Drejtësia në kolaps, shteti në kolaps, pa Gjykatë Kushtetuese, pa Gjykatë të Lartë, pa prokuror që të ndjekin çështjet e mprehta të kriminalitetit nuk mund të jetë zgjedhja për vjedhjen me ligj që votohet sot në Kuvend. Ndodhemi në emergjencë kombëtare.
