Kreu i qeverisë, Edi Rama, për të mbrojtur projektin e tij për shembjen e Teatrit dhe ngritjen e kullave në truallin e tij, e ka nisur fjalën në Kuvend sot duke shpalosur një dokument që i ishte dërguar Lulzim Bashës kur ishte kryebashkiak, për të privatizuar Teatrin e Metropolit. Por, kryetari i opozitës Lulzim Basha i ka kthyer përgjigje flakë për flakë nga Vlora, që atje ku është mbajtur takimin e opozitës së bashkuar.
Ja debati midis tyre i transmetuar live, Rama nga Kuvendi dhe Basha nga Vlora:
Rama: Ajo që më nxori këtu është një shkresë të cilën Florian Mima, ministër i Ekonomisë, ia dërgon Lulzim Bashës, kryetar i bashkisë. Dhe çfarë i kërkon? I kërkon privatizimin e Teatrit të Metropolit, në kllapa shënon Floriani, Teatri i Estradës, për llogari të deputetit Astrit Veliaj. I vetmi aset kombëtar në dispozicion të Bashkisë së Tiranës, i transformuar nga një kafene e degraduar në teatër të metropolit, para se Basha të shkonte në bashki, çohet për privatizim. Jo për partneritet publik privat, as për të ndërtuar një tetarë të ri të metropolit në këmbim të kontributit të z. Veliaj dhe në funksion edhe legjitim të z. Veliaj pasi të investonte për teatrin e ri, por privatizim për të ndërtuar pallat me dyqane dhe dhoma gjumi. Natyrisht Estrada është domein ekskluziv i PD dhe është absolutisht e drejta legjitime e Lulzim Bashës, Florian Mimës e të gjithëve në atë oborr të kenë për Estradën fjalën e fundit, por jemi para një shembulli në qindra mijëra shembuj që të mund të nxjerrin për të ballafaqur fytyrën e tyre me faktet që tregon sesa hipokrite është e gjithë përpjekja e tyre.”
Basha: Kryehajduti kërkon skutave për shkresa të pavlera. Teatri i Metropolit është aty! Kinema 17 Nëntorin, kinema Republiken, kinema Partizanin, kinema Ali Demin, i ka shkatërruar Rama dhe ka ndërtuar pallate.”
