Pasi ka marrë mjekimin e nevojshëm dhe ndërkohë për fat ndodhet jashtë rrezikut për jetën në pavijon në spital, i moshuari Haxhi Lika ka treguar për atë që i ndodhi, teksa ishte në shtrat.
“Kam një armë, por nuk e preka me dorë mëngjesin e djeshëm”- ka thënë ai, sic raporton “News 24”. Ai tregon se në orët e para të mëngjesit dëgjoi një zhurmë të fortë.
“Dëgjova një zhurmë, më qëlloi policia. Nuk di pse na rrethoi policia, ne nuk kemi patur kurrë probleme me policinë ”- thotë ai, teksa tregon se nuk njeh asnje nga dy personat qe thuhet se kerkoheshin nga policia si te dyshuar per vrasje.
“Dua drejtesi, perse me qelloi policia”- tha ai.
AKSIONI
Forcat RENEA futen në fshatin Remas të Lushnjës për arrestimin e dy të kërkuarve për vrasje, por veçse nuk arritën prangosjen e tyre, në rrethana ende të paqarta, mbeti i plagosur me plumb në kokë një banor i moshuar.
Ngjarja ndodhi dje rreth orës 05:30, kur specialët mësynë në mënyrë të befasishme për të ushtruar kontrolle në banesat e këtij fshati. Sipas burimeve, Policia kishte marrë informacion në rrugë operative se aty strehoheshin shtetasit Laert Haxhiu dhe Orges Bilbili, të dy persona me rekorde kriminale dhe autorë të dyshuar të masakrës së 11 tetorit 2017, ku humbën jetën Jurgen Hoxha dhe Zamir Latifi dhe u plagosën dy të tjerë.
PLAGOSJA
Familjarët dhe banorët e fshatit akuzuan Policinë se i kishte tmerruar ata gjatë natës e për më tepër kishin qëlluar me armë zjarri, duke sjellë pasojë plagosjen e 77-vjeçarit Haxhi Lika. Familjarë të tij deklaruan se i moshuari kishte qenë në krevat kur një plumb e ka qëlluar atë. Ndërkaq, Policia bën të ditur se i moshuari nuk i është bindur thirrjes dhe ka dalë në dritare me armë në dorë. Në këto kushte, Policia ka qëlluar me armë dhe në rrethana ende të paqarta 77- vjeçari mbeti i plagosur.
“Forcat speciale RENEA, rreth orës 05:30, kanë ushtruar disa kontrolle banesash në fshatin Remas të Lushnjës. Ndër to edhe banesën e shtetasit H.L., 77 vjeç, pasi disponohej informacion se në këtë banesë strehoheshin dy shtetas të dyshuar si autorë vrasjesh. Në momentin që është bërë rrethimi i banesës, konform gjithë procedurave standarde të ndërhyrjes, shtetasi H.L. nuk i është përgjigjur thirrjes së Policisë, por ka dalë në dritare me një armë në dorë (rezultoi armë gjahu).
Ndodhur në këto kushte, Policia ka qëlluar në ajër, duke i bërë thirrje për të dalë nga banesa. Në rrethana ende të paqarta, shtetasi H.L. është dëmtuar në kokë dhe ndodhet në spital jashtë rrezikut për jetën. Eksperti mjeko-ligjor po punon për përcaktimin e shkakut të dëmtimit dhe rrethanat”, thuhej në njoftimin e Policisë së Shtetit.
