Të dëgjosh a lexosh Lindita Halimi në vend të Linda Halimi është pak e çuditshme, por këngëtarja dëshiron që t’i referohemi me emrin e saj të plotë. “Në Kosovë, Lindita ishte emër shumë i konsumuar. Pastaj, kur erdha në Amerikë, Linda ishte emër shumë i konsumuar,” tha ajo sot në një intervistë për “Wake Up” në Top Channel.
Pas publikimit të klipit të këngës “Murda”, intervistat e Linditës rrotulloheshin medoemos rreth skenës së puthjes me një tjetër vajzë.
“Unë jam person shumë i rezervuar. Gjërat intime i kam ruajtur për në dhomën e gjumit. Skena ka qenë shumë e sikletshme [për t’u realizuar] sepse teksa ne duhet të silleshim sikur ishim vetëm, pas kamerës ishin pesë persona të ndriçimit, grimierë, gjithë stafi që po punonte me në. Na u desh ta përsërisnim puthjen gjashtë herë.”
“Nuk ishte shumë ndryshe,” tha Lindita për puthjen me një vajzë. I vetmi problem dhe dallim: buzëkuqi. “Ngaqë i kishim të dyja buzët e lyera, sa herë na duhej të përsërisnim puthjen, duhet të lanim dhëmbët dhe të lyenim buzët sërish.”
Skena ishte ide e regjisorit, Chris Brann, ndërsa kënga, ide e djalit dhjetë vjeçar të producentit të këngës, Nealante’. Për sa i përket aludimeve se skena u frymëzua nga kënga e Rita Orës, “Girls”, Lindita tha se e kishte dëgjuar këngën më parë, por s’e kishte parë klipin. Pasi e pa, “kuptoi ngjashmëritë” dhe e la me aq./anabel/
