Kapiteni i ri i Skocisë, Andy Robertson ia ka bërë të qartë shokëve të skuadrës që të mos bëjnë më gabime si ato kundër Belgjikës, pasi do të kalojnë një tjetër mbrëmje horror të hënën kundër Shqipërisë në “Hampden Park”.
Skocezët u shkatërruan 4-0 nga Belgjika (humbja më e keqe në shtëpi për skocezët prej 45 vitesh) dhe pavarësisht se Shqipëria është shumë larg nivelit të skuadrës së renditur e treta në Kupën e Botës, mbrojtësi i Liverpool thotë që skuadrën e pret i njëjti fat nëse përsëritet loja e të premtes mbrëma.
“Ishte një mbrëmje shumë e vështirë”, tha Robertson. “Belgjika është një skuadër me lojtarë të klasit botëror, por pjesa më e madhe e golave erdhi për shkak të gabimeve tona. Ky është zhgënjimi më i madh i mbrëmjes. Duhet të mos bëjmë më të tilla gabime”.
Për ndeshjen kundër Shqipërisë, mbrojtësi i Liverpool tha: “Nuk besoj se kemi nevojë për motivim ekstra. Duhet të shohim gabimet që kemi bërë dhe t’i korrigjojmë. Është një grup i rid he formacion i ri, sigurisht që do të kemi probleme përshtatjeje, por duhet të mos bëjmë gabime bazike”.
Ndërsa trajneri Alex McLeish tha: “Edhe skuadra më e mirë në historinë e Skocisë do ta kishte pasur të vështirë kundër Belgjikës. Kishim një detyrë shumë të rëndë, por të paktëm kemi mundësi të mësojmë nga gabimet. Faji është i imi sepse i shtyva lojtarët që të pasojnë topin më shumë me njëri-tjetrin, tani duhet të ndryshojmë dhe të provojmë diçka të re”.
