Ka përfunduar më barazim 1-1 sfida e parë e javës së tretë të Superiores në Korçë mes Skënderbeut dhe Laçit që u luajt pa praninë e tifozëve. Uzuni shënoi një super-gol në minutën er 30 ndërsa Muzaka iu kundërpërgjigj në minutën e 34-t. Në pjesën e dytë kurbinasit patën shansin e mirë që të fitonin sfidën pas daljes me të kuq të Abazit, por korçarët arritën që të ruanin balancat. Kështu, ndahen në barazim dy ekipet që mbajnë dy vendet e para të tabelës së renditjes.
Pjesa e parë – Laçi ka ditur që të zotërojë më së miri fushën në minutat e para të sfidës. Lojë e qartë nga krahët, ndërsa Uzuni dallon mes të tjerëve. Shtubina bëhet vendimtar në disa momente në krahun e djathtë të kurbinasve, ndërsa Eller dhe Sefgjinaj ndihmojnë më së miri skuadrën për të sulmuar. Por, pas nuk mbeti Skënderbeu që pas problemeve të minutave të para arrin që të bëjë dalje të duhura me Demte dhe Krasniqin.
Mirëpo, në minutën e 30 fati i buzëqesh skuadrës më kërkuese, Laçit. Një top i vertikalizuar për tek Uzuni, i cili e uli mjaft mirë kur ishte brenda zonës së rreptësisë, ndërsa sfera u ndal në trekëndëshin e majtë të Teqjes pas të majtës potente të beratasit.
Festa nuk zgjat shumë për Laçin. Një kundërsulm i Skënderbeut në minutën e 34-t sjell barazimin në Korçë. Shtyllë dhe më pas Muzaka që zhytet për të dërguar në rrjetë topin. 1-1 në Korçë dhe kaq mjafton për të mbyllur 45-minutat e para të ndeshjes.
Pjesa e dytë – Skënderbeu është më kërkues që në nisje të fraksionit të dytë të lojës. Në minutën e 52 Demte kaloi mbrojtësin Gjoni dhe më oas arriti që të gjuante, por nuk preku rrjetën. Vetëm pak minuta më vonë Muzaka u shfaq nga krahu i djathtë i sulmit, ku vertikalizoi për Gripshin, por ky i fundit nuk arriti që të devijojë sferën në portën e boshatisur.
Sërish Gripshi ka rastin më të mirë pak minuta më pas, pikërisht në të 61-tën, por Gjoni ndali topin kur ai po shkonte te Krasniqi që mund të dërgonte në rrjetë.
Më tej loja bëhet e fortë dhe nervat zbresin në fushë, ku në minutën e 73 Abazi mori kartonin e dytë të verdhë dhe doli jashtë fushës duke e lënë skuadrën bardhekuqe me një lojtar më pak. Mërgjyshi bëri zëvendësimet e momentit, ndërsa Shehi e pa të udhës që të forcojë skuadrën për të marrë rezultat pozitiv.
Edhe pse me një lojtar më pak, Skënderbeu u bë i rrezikshëm në dhjetë minutat e fundit të sfidës. Loja u zhvendos në portën e bardhezinjve, të cilët duket se kishin probleme në këtë drejtim. Nuk e shfrytëzuan momentin që Skënderbeu kishte një lojtar më pak. Ndërsa Selmani në disa momente është treguar vendimtar me ndërhyrjet e bëra. Në fund të takimit, pikërisht në minutën e dytë shtesë Vangjeli pati rastin më të mirë për të shënuar, por topi shkoi mbi kuadratin e portës. Shansin më të mirë e ka në fundin e takimit maqedonasi Altiparmakovski, por që nuk arriti ta dërgojë në rrjetë.
