Një gjyqtar i Utah, SHBA, ka deklaruar të martuar një grua 74-vjeçare me partneren e saj lesbike, tre muaj pasi kjo e fundit ndërroi jetë.
Gjykatësi Patrick Corum deklaroi se Bonnie Foerster ishte martuar ligjërisht me Beverly Grossaint, e cila vdiq në maj në Salt Lake City në moshën 82-vjeçare.
Utah nuk aplikon martesën e zakonshme ligjore, por banorët mund të bëjnë kërkesë në gjykatë për të njohur lidhjen e një martese.
“Zemra ime ishte plot me dashuri”, tha zonja Foerster kur u dha vendimi më 21 Gusht.
Gjyqtari Corum “u afrua, më përqafoi dhe më tha, po ju jeni e martuar”, tha ajo për BBC.
Robert Hoole, avokati Foerster dhe mik i çiftit për më shumë se 20 vjet, tha se vendimi është i pazakontë, megjithëse jo i paprecedentë.
Hoole tha se vendimi i marrë këtë muaj shënon rastin e dytë të këtij lloji në Utah.
“Vendimi është i pazakontë edhe për faktin se bëhet fjalë për martesë brenda së njëjtës gjini”.
Foerster u takua për herë të parë me Grossaint më shumë se 50 vjet më parë në New York City në janar 1968.
Takimi i tyre i parë ndodhi në një kohë të vështirë për Foerster. Ajo po përpiqej të largohej nga bashkëshorti i saj dhunues, ndërkohë që mbante syze dielli për të fshehur sytë e nxirë. “Isha e goditur nga koka deri te këmbët”, tha ajo.
“Ajo erdhi tek unë dhe më tha ‘hiqi syzet, është Janar”, tha Foerster.
“Kimia ishte e menjëhershme. Unë pashë sytë e saj blu dhe kuptova që ajo ishte njeriu i duhur për mua”.
Vetëm pas një jave më vonë çifti vendosi të jetonin së bashku dhe që nga ai moment ato ishin të pandara.
