“Qeveria shqiptare ka pranuar se përdorimi i drogave nga të rinjtë është në rritje”.
Kështu u shpreh dje eksperti amerikan i Antidrogës, Eric Siervo, njëkohësisht zëvendëspresident i CADCA-së, e cila merret me ngritjen e koalicioneve për parandalimin e përdorimit të drogave te të rinjtë. Për këtë arsye, qeveria në bashkëpunim me ambasadën amerikane në Shqipëri kanë sjellë në vendin tonë këtë organizatë ndërkombëtare, ku u zhvillua një takim në Shkodër. Sipas ekspertit amerikan, në takimet e nivelit të lartë në Shqipëri pranohet rritja e numrit të përdoruesve të drogës.
DEKLARATA
“Sigurisht që kemi takuar zyrtarë të lartë të qeverisë shqiptare në Ministrinë e Brendshme, të Arsimit, zyrtarë të lartë të Shëndetit Publik dhe përfaqësues të tjerë të qeverisë. Në të gjithë këto takime tonat, ata e kanë mbështetur këtë ide apo këtë nevojë dhe kanë thënë “Po”. Është e vërtetë se ka një perceptim dhe se është në rritje përdorimi i drogave. Vetëm në sajë të këtyre kontakteve kemi qenë në gjendje të identifikojmë ato komunitete më të përshtatshme, ku ne të fillonim të zbatonim projektet pilote”, shprehet Siervo.
Eksperti i Antidrogës thotë se në Shqipëri nuk ka të dhëna të sakta për përdoruesit e drogës dhe nuk dihet se cili është problemi real, ndaj ngritja e koalicioneve komunitare do të sjellë një ndryshim, duke marrë të dhënat reale, por edhe duke ditur saktësisht problemet.
Sipas tij, çelësi i suksesit është parandalimi i përdorimit të drogës nga të rinjtë, ndaj duhet t’i parandalojmë brezat e ardhshëm, por edhe ata të sotshëm, në përdorimin e drogës.
“Kjo kërkesë që ne të jemi në Shqipëri ka ardhur edhe nga ambasada amerikane, por edhe nga vetë shteti shqiptar. Këtu nuk ka të dhëna të besueshme apo të sakta në nivel kombëtar se cili është problemi, cilat droga, cili është niveli i përdorimit dhe ne e kemi këtë përvojë për të ngritur këto koalicione për të sjellë ndryshimin e kërkuar”, thotë Siervo.
Një pjesë e punës së koalicionit, vijon eksperti amerikan, do të jetë që edhe vetë banorët të kthehen në një farë shkencëtari social, që edhe ata vetë të mbledhin informacion dhe të vëzhgojnë se cilat janë ato droga më problematike që përdoren, pasi nuk mund ta bësh me hamendeshim se shqetësim është për shembull, kokaina. Duhet të kesh të dhënat dhe më pas të dish se si dhe ku të ndërhysh.
BASHKEPUNIMI
Numri dy i organizatës ndërkombëtare CADCA tregon edhe qëllimin dhe mënyrat më të mira për të arritur ndryshimin social në parandalimin e përdoruesve të drogës.
“Qëllimi i takimit është për të grumbulluar në një vend përfaqësues të ndryshëm të komunitetit, drejtues apo palë të interesuara për të arritur një bashkëpunim dhe për të parandaluar rininë në përdorimin e drogës, duke parë këto komunitete lokale si zgjidhja më e mirë për t’i trajtuar në nivelin lokal. Duam të bashkojmë në një koalicion përfaqësues të komunitetit duke nisur nga qeveria vendore, institucione, organizata, banorë në mënyrë që ata të mblidhen dhe ata t’i identifikojnë vetë problemet e tyre, për të cilat janë mënyrat më të mira për të arritur ndryshimin social në komunitetin e tyre”. Ngritja e koalicionit në Shkodër nga CADCA do të bëhet në bashkëpunim me organizatën YWCA, ndërsa puna sapo ka filluar. Edhe Shkodra mendohet si një qark me probleme dhe përdorues të shumtë të drogave të ndryshme, kryesisht te të rinjtë.
