Rënia e nivelit të prurjeve gjatë muajve të verës nxjerr në pah nivelin e lartë të ndotjes në lumin Osum që kalon mes përmes Beratit. Derdhja e ujërave të zeza dhe hedhja e mbetjeve nga qytetarët mbeten problematika pa zgjidhje në qytetin muze që cdo vit pret mijëra vizitorë shqiptarë e të huaj.
Këta peshkatarë janë të vetmit që i kanë mbetur besnikë Osumit.
Ndotja dhe era e keqe nga derdhja e ujërave të zeza bën që qytetarët e tjerë të shpejtojnë hapat kur u duhet të ecin përgjatë lumit që kalon përmes Beratit.
Rënia e prurjeve gjatë muajve të verës e nxjerr në pah edhe më shumë problematikën ndërsa reshjet e verës duket se kanë vënë në lëvizje mbetjet përgjatë shtratit të lumit.
Fajtorë janë edhe vetë qytetarët, të cilët nuk e shohin më lumin si dhuratë të natyrës, por si kanal të ujërave te zeza dhe vend për hedhje mbetjesh.
“Ka mbeturina, nuk është pastruar akoma”, tha një qytetar.
Shqetësimi është i vjetër, por mbetet pa zgjidhje në qytetin që cdo vit pret mijëra e mijëra vizitorë shqiptarë e të huaj duke ofruar kështu një pamje të parë larg asaj që në të vërtetë ofron.
“Berati duhet të jetë më mirë, se i takon të jetë qytet i pastër”, u shpreh një tjetër banor.
Nga ana tjetër burime të bashkisë jashtë kamerave shprehen se e vetmja zgjidhje për problematikat që ka lumi Osum do të jetë zbatimi i projektit që parashikon sistemimin dhe reabilitimin total të tij, i cili deri më sot nuk është vënë në jetë për mungesë fondesh.
