Deri para pak kohësh, askush nuk e njihte. Saman Ghodos, ishte i njohur veçanërisht në Iran apo Suedi, ndërsa tashmë ka firmosur në Ligën e Parë franceze, me Amiens, duke u kthyer kështu edhe iraniani i parë që luan në kampionatin francez.
Gjithsesi, 24-vjeçari, vetëm 5 vite më parë luante në divizionin e tretë suedez, dhe gjithashtu punonte edhe në një Call Center, për të fituar të ardhura të majftueshme për të siguruar jetesën. I lindur në Malmo, deri në 2012 ai luante me ekipin e Bunkeflo. Shënonte shumë pak, por kishte energji dhe vraponte pa fund. Trelleborg, një emër më i madh, i dha një shans dhe Ghodos spikati mjaftueshëm sa për t’u ngjitur një kategori më lart. I dha besim Syrianska, klub i themeluar nga emigrantë nga Azia, dhe Ghodos krejt papritur e kuptoi se mund të luante futboll profesionist dhe dinte të luante mirë. Dy sezone cilësore, 14 gola dhe hapi i radhës ishte Ostersund-i, në vitin 2016.
Më pas, në 2016, aty shënoi 10 gola, dhe në sezonin tjetër shënoi edhe 8 tjetër. U kthye në një lider, prej shpirtit luftarak dhe betejave në fushë, teksa shkëlqeu edhe në Europa League.
Luajti një ndeshje për kombëtaren suedeze, por preferoi më pas të luante për Iranin, që e mori në Kupën e Botës, ku u fut tre herë në pjesën e dytë. Pak minuta i mjaftuan të tregonte se ishte një sulmues i mirë jo vetëm për në Suedi dhe fillimisht arriti një marrëveshje në Spanjë te Hueska, më pas Ostersund deshi një shifër më të lartë dhe thuajse e mbylli me Renes, por firma reale erdhi për Amiens, që ka paguar 4 milionë euro, plus bonuse. Shifër e jashtëzakonshme, vetëm Zlatan Ibrahimoviç dhe Alexander Isak kanë kushtuar më shtrenjtë në kampionatin suedez.
